E cantante Maluma a sorprende su miyones di siguido diaranson ultimo na momento cu el a elimina abruptamente su cuenta di Instagram. Sin aviso previo, e Colombiano a desaparece di e red social.
Faltando un splicacion pa su decision, hopi a señala cu e artista tabata rabia pa un video di e futbolista Neymar cantando su cantica nobo ‘Hawai’ despues di gana cu su team, Paris Saint Germain.
Curiosamente, despues cu e video en cuestion a bira viral, Maluma a cera su cuenta di Instagram, incluso esaki a bira un tendencia mundial riba Twitter. Cibernautanan a considera cu e cantante di 26 aña a purba evita e ola di comentario y meme.
Pero algun ora despues, e cantante a aparece back riba Instagram anticipando un Instagram Live. Den esaki, hunto cu su productornan ta papia di e disco nobo.
E cantica nobo Hawai a wordo lansa na juli e aña aki, y segun Page Six, e letra ta inspira riba e modelo Natalia Barulich, ex-pareha di Maluma ken algun siman atras a mustra hopi romantico cu Neymar. “E no a bisa Natalia nada. El a skirbie basando riba su propio experiencia personal.”
E storia den e cantica ta tocante un homber mirando con su ex ta publica riba rednan social cu su pareha nobo, djis pa dun’e zelos pasobra ainda e ta namora di dje.
Na momento cu e Argentino, Angel di Maria a publica e video den cual Neymar ta canta e cantica en cuestion, centenares di usuario a subi perfil di Maluma y a skirbi burlando di su situacion. Esaki lo a conduci na cera su cuenta.
Lo cierto ta cu Maluma y Natalia Barulich a termina nan relacion na october 2019 despues di casi dos aña. E tempo aya, prensa Brasileño ya tabata papia cu e modelo tabata infiel cu Neymar. Na mei e aña aki Barulich y Neymar a protagonisa un serie di potret pa revista GQ. Neymar a mustra hunto cu Barulich riba rednan social, pa loke ta pensa cu por tin un relacion entre nan.
Te awo, e protagonistanan ta mantene silencio.
