Home Local Mañan homenahe na Trio Rescate di Memoria na Cas di Cultura

Mañan homenahe na Trio Rescate di Memoria na Cas di Cultura

736

Mañan, diadomingo, tur hende amante di musica inolvidabel y romantico di cuerde specialmente guitara, ta cordialmente invita pa comparti hunto na Cas di Cultura for di 3or atardi te cu 7or anochi. E ta un homenahe na e Trionan musical cu a existi y esunnan cu ainda ta existi na Aruba. Homenahe na Trio ‘Rescate di Memoria’ ta un evento organisa den cuadro di Dia Internacional di Idioma Materno y Aña di Papiamento 2018.

Durante un conferencia di prensa e integrantenan di e diferente Trio y participante na e evento aki a expresa nan invitacion pa disfruta di nan musica bunita. Trio Los Arubeños lo deleita publico cu algun piesa di Trio Los Aventureros (1957-1964) cu a consisti di Doy Salsbach, Stanley Albertus (d.f.m) y Martin Dania (d.f.m).

E promotor cultural, Mirto Lacle, a laga sa cu nan lo bin cu un programa completo cu entre otro baile pa Club di Movimiento. E pianista Johnny Scharbaay y si grupo di amigo lo dedica un homenahe na Jacobo ‘Toty’ Arends (d.f.m) Tambe na Ronny Kock, Etty Toppenberg y otro artistanan cu lo deleita publico cu su musica di antaño yen di nostalgia y recuerdo.

E lo ta un atardi cultural cu poesia, canto, baile, musica y proyeccion di documentario di Trio Matamoros. Tambe sr. Lacle lo presenta parti di un documentario cu e ta bin trahando pa e memoria di nos musiconan y miembronan di e Trionan local no bay perdi. E tema central di evento aki lo ta Trio cu a existi y cu a laga un recuerdo atras. Pero tambe otro Trionan cu ta activo ainda sea individual of integral manera Rondalla Universo Aruba.

Rondalla lo presenta su CD nobo ‘Su Musica Mester T’ey’ cu 14 tema musical den nos lenga crioyo Papiamento. E atardi aki lo bira uno inolvidabel unda nan lo bay bek den pasado na e era nostalgico aki. Pa medio di e proyeccion di un documentario preliminar lo mustra algun entrevista cu diferente persona of descendientenan di nan cu a forma parti di historia di nos Trionan local.

Esaki lo tuma luga mañan riba diadomingo, dia 18 di februari for di 3or atardi te cu 7or di anochi na Cas di Cultura. Entrada ta gratis. Biblioteca Nacional Aruba, Departamento di Cultura di Aruba y Instituto Pedagogico Arubano kier invita bo na e homenahe aki. No perd’e!