Manera tabata teme, tirenan a pega candela riba dump y e huma preto tabata bisto for di Parkietenbos te Palmbeach. Tabata algo mas cu un siman pasa cu ambientalistanan a tuma nota cu a cuminza acumula tire riba dump y a adverti cu e acumulacion aki ta forma un riesgo grandi pa candela cu ta dificil pa paga.

E motibo pakico tira tirenan bieu banda di otro riba un dump lo tabata peligroso, ta pasobra cu cada biaha ta experiencia candela spontaneo pa motibo di gasnan comprimi bou di tur e sushedad. E candelanan aki ta cende e tirenan cu ta produci e huma preto pisa. Y dicho hecho.

Ayera e tirenan a pega candela. E potretnan ta ilustra e realidad di dump di Parkietenbos. Un sero di sushi cu ta keda plama huma toxico. Hasta turistanan a haci remarca cu ta ilustra e peliger pa e producto turistico di Aruba. E reportahe grafico ta ilustra con impactante e huma preto ta y cu cada bishitante cu a sali of yega aeropuerto ayera, a haya un bista di e realidad cu na Aruba ainda ta hiba un maneho di sushi cu ta contra tur regla ambiental internacional y ta contra tur regla pa loke ta bienestar y salud di hende, manera cu e ta poni den e rapport di PAHO.

Mester bisa cu comerciante Jamal Khan riba su rednan social a bisa cu e tin un negoshi na Barcadera y a sugeri varios biaha pa tuma e tirenan pa 10 cen pa kilo, cu ta representa mas o menos 1 florin pa tire, y converti esaki den azeta. Ta e mesun azeta cu WEB ta usa actualmente como combustible of su compania mes lo por produci energia, di forma cu Elmar por cumpra esaki na un prijs competitivo. No ta prome biaha cu Sr. Khan a haci e oferta, pero nunca e idea a concretisa.

Bon Dia Aruba a tuma contacto cu vocero di Minister di Medio Ambiente y Naturalesa, Ursell Arends, pero un biaha mas no a haya ningun reaccion. No ta prome biaha cu ta haci Minister Arends pregunta, pero pa un of otro motibo, no ta haya contesta riba esakinan. E pregunta specifico e biaha aki ta kico ta e plan pa atende cu e problema inmediato.

LEAVE A REPLY

Please enter your comment!
Please enter your name here