firma amienda 2.jpeg

Un grupo chikito a manifest contra e amienda pa pareha registra di mesun sexo. Na mesun momento un otro grupo chikito di e comunidad LGBT a protesta dilanti e bar Chaos na Playa.

Parlamentario di AVP  Desiree de Sousa – Croes tambe lo entrega e amienda adapta. Dia 7 juli y el a entrega esaki na parlamento sinembargo despues a resulta cu e amienda tecnicamente no ta hinca bon den otro. Nan a mehora e amienda y awor ta planea di entrega di nobo.

Mientrastanto e protesta contra e amienda aki ta sigui. Ayera bandi 10’ or un grupo catolico  colectando firma contra di e amienda a haci entrega di manifiesto na presidente di Parlamento. Lidera  pa sra. Hiacintha Thijsen, e grupo a tene un protesta tame  unda cu a exigi pa parlamentario Croes  hala aden su manifiesto. E amienda mester bay cambia e ley y esaki parlamento lo trata dialuna proximo 22 di Augustus.

Sra. Baby Bello – Croes encarga cu guia pa recauda fondo contra matrimonio di mesun sexo ta indica cu e cantidad di firma ta bayendo hopi bon. Tur 9 parokia na Aruba a haya formulario unda cu personanan por a pone nan firma, cual ta ocupa cu ne ainda. Segun e Sra. Bello – Croes ta splica despues di e protesta dialuna,  a sinta hunto atrobe cu e grupo di iglesia catolico cu pastoor Reinares.

Sosten gruponan
E carta cu a bin entrega na Parlamento ayera mainta ta un carta cu e pastoor ya a firma hunto cu forsa di 3 grupo mas cual ta Ministerio di Hobennan Catolico Aruba, Renobacion Carismatico Catolico Aruba y Legion di Maria/Curia. “El a duna nos autorisacion pa entrega e carta y wardando pa dialuna entrega tur firma di tur parokia. P’esey nos no ta cla ainda y anochi nos lo tin un reunion atrobe cu esun cu ta recauda tur e firma nan di tur parokia, pa trece nan dilanti. Asina lo wak exactamente cuanto firma nos iglesia catolico a recauda.” Asina e carta a bisa.

Muestra firma
A puntra Sra. Bello – Croes tambe kico asina kier mustra cu e cantidad di firma finalmente. E ta bisa: “Nos kier mustra cu nos ta na banda di nos Dios y cu nos ta respeta Reino di Dios. Cu no por acepta un matrimonio di mesun sexo pasobra Dios no kier esey pa ningun hende y nos ta respeta tur persona si nan tin relacion of kico cu nan por sinti. Nos ta resa pa nan y pidi Dios pa misericordia pa nan y nan por bin na pia di Señor Hesucristo bek. Pero no kier pa e matrimonio tuma luga riba nos isla Aruba, pasobra tur locual cu bin di afo, nos Aruba ta adapta cu no ta bon. Kiermen mester resa pidi dios pa no bin mas inmoralidad riba nos pais Aruba. Si bo conoce ley di Dios, bo ta respeta ley di Dios. P’esey ta uni hunto pa sigui su ley y Dios tin Amor y misericordia  pa cada un di nos.”

LEAVE A REPLY

Please enter your comment!
Please enter your name here