Mariniernan na Aruba ainda ta traha den condicionnan insaludable

(AFP) – Mariniernan Hulandes staciona na Marinierskazerne Savaneta a reporta di tin añas ta traha y come den facilidadnan plaga cu beskem, calor excesivo, humedad y problema cu pest, a pesar di promesanan ripiti di Ministerio Hulandes di Defensa pa mehora e situacion. Segun un investigacion publica diasabra pa plataforma investigativo Hulandes, Follow the Money (FtM), e problemanan ta bay back hopi mas cu un decada, y ta keda sin resolve hasta despues di biyones di euro den gasto adicional di defensa.

E investigacion ta pinta un imagen di fayonan continuo den infrastructura na e base na Aruba, unda aproximadamente 250 marinier ta staciona permanentemente, cu otro 150 personal cu ta join durante ehercicionan militar. Mientras Defensa ta bisa cu tin un cantina nobo planea, FtM ta reporta cu ta poco probable cu lo completa e construccion prome cu di dos kwartaal di 2027.

Si cumpli cu e fecha aki, hopi di e personal cu ta sirbi actualmente na Aruba lo a pasa henter nan despliegue ta depende riba facilidadnan temporal cu inspectornan repetidamente a considera como inadecua.

Keho di añas atras

Segun FtM, preocupacion tocante mal estado di facilidad di cantina y cushina dentro di e forsanan arma Hulandes no ta nobo. Sindicatonan militar a keha pa añas tocante condicionnan antihigienico na instalacionnan di defensa rond di Reino.

Segun reportahenan, inspeccionnan a identifica problema na al menos 70 sitio, variando di infestacion cu pest y sistemanan di pos cu ta leak, te muraya tapa cu beskem y edificionan den deterioro.

E asunto a yega Parlamento Hulandes na 2018, ora legisladornan a cuestiona Secretario di Estado pa Defensa e tempo ey, Barbara Visser tocante e estado di facilidadnan militar. E tempo aya, Visser a reconoce cu añas di recorte presupuestario a resulta den atrasonan significante den mantencion, y a priminti cu lo haci mehoracion, maske el a adverti cu no por resolve e problemanan den un solo dia.

Ocho aña despues, FtM ta conclui cu tiki a cambia pa e personal staciona na Aruba.

Tin renobacion, pero no na Aruba

Un di e aspectonan mas impactante presenta pa FtM ta e contraste entre Aruba y bisiña Corsou.

Segun e investigacion, facilidadnan di cantina militar y kazerne na Parera y Suffisant na Corsou si a keda renoba.

Na Marinierskazerne Savaneta, sinembargo, e unico proyecto di construccion completa ta e edificio pa sede di e oficial comandante.

E renobacion di e facilidad di cantina, priminti pa hopi tempo, ainda no a materialisa.

E edificio original di restaurant a clausura na 2022 prome cu e remodelacion anticipa. Ministerio di Defensa inicialmente a converti un edificio di acomodacion pa oficialnan no-comisiona den un area di cantina temporal, pero pronto e solucion a proba inadecuado.

Un tent temporal ekipa cu generator y container pa cushina y preparacion di cuminda a keda instala subsecuentemente como un solucion di emergencia.

Inspeccion di sindicato a bati alarma

FtM ta reporta cu representantenan di sindicato militar Hulandes, VMB a bishita e sitio na april di aña pasa. Segun e rapport di nan inspeccion, nan a haya sistema di airco inadecuado, seccionnan los di e structura di tent, y materialnan improvisa di construccion.

E sindicato tambe a describi partinan di e structura exterior frustia, generando preocupacion tocante seguridad.

Personal trahando paden a keha tocante zonido constante di material di tent cu ta zwaai, cable electrico y generator.
Empleadonan responsable pa preparacion di cuminda a reporta dolor di cabes, mareo y incomodidad general despues di pasa henter un dia di trabao na e facilidad.

E sindicato a midi un temperatura paden di aproximadamente 34 grado Celsius.

Defensa a haya beskem, humedad, y restonan di pest

Mas preocupante ainda, segun FtM, tabata e hallazgonan di servicio di salud ocupacional di Ministerio di Defensa durante un inspeccion realisa na october di 2025.

Inspectornan a conclui cu prepara cuminda den e facilidad temporal probablemente lo resulta den malesa relaciona cu cuminda.

Nan rapport supuestamente a documenta beskem paden di tanto e containernan di cushina como esnan pa laba, como tambe den unidadnan di airco cu a bula aire directamente riba areanan di preparacion di cuminda.

A haya humedad y condensacion rond di e facilidad, incluyendo den kabinet electrico y rond di bombionan di luz.

Inspectornan tambe a documenta cantidad di musca morto y evidencia di pest, incluyendo pupu di raton bao di vloer di e tent.

Segun FtM, awa residual y residuo di cuminda a acumula bao di e structura pasobra sistemanan di drenahe tabata sea ausente of inefectivo.

Un septic tank a crack despues cu e tereno a hundi, permitiendo su contenidonan pa basha y plama riba e area su alrededor.

Paden, e temperatura regularmente tabata alcansa entre 35 y 40 grado Celsius.

E inspeccion a conclui cu esakinan no tabata problemanan isola di mantencion, sino problemanan structural cu lo continua curashando crecemento di beskem a menos cu reemplasa henter e facilidad.

Haci limpi no ta resolve e problema

FtM ta reporta cu Ministerio di Defensa a propone un serie di medida interino, incluyendo limpiesa profundo di unidadnan di airco, instalacion di un tent interno nobo pa reduci temperatura, y exploracion di puntonan di entrada cu airco.

Sinembargo, inspectornan a adverti cu e accionnan aki lo haci tiki pa resolve e problemanan subyacente. Tanten cu humedad keda trapa den e structura, beskem lo keda bin back.

E rapport tambe a identifica seyonan daña, drenahe pober, biento fuerte causando cu e tent a scheur, ekipo cu ta frustia, y aperturanan structural cu a permiti acceso facil pa pest.

Den otro palabra, segun e inspectornan cita pa FtM, e problemanan tabata construi den e facilidad temporal mes, y no tabata resultado di falta di limpiesa.

Clausura temporal

Anteriormente e aña aki, eventualmente a cera e tent di cantina.

Segun Ministerio di Defensa, cita pa FtM, e clausura a resulta di un sistema di drenahe cu leak.
Otro fuentenan a sugeri cu e clausura a bin despues di un infestacion cu raton, maske Defensa a rechasa cu tabatin un plaga di raton di escala completo. Un vocero di Defensa si a reconoce cu a yama specialistanan di pest control.

Actualmente, un compania externo di catering ta suministrando cuminda, mientras Defensa ta spera cu e facilidad temporal lo habri back pa fin di augustus.

E ministerio tambe a rechasa cu seguridad di cuminda tabata comprometi.

Añas wardando pa un restaurant nobo

A pesar di un historia largo di keho, FtM ta reporta cu financiamento pa construccion di un cantina nobo a keda aproba pa Agencia di Real Estate di gobierno Hulandes apenas na juni 2026.
Awo ta spera cu e proyecto lo pasa fase di destaho.

Si e construccion sucede inmediatamente ta depende si e ofertanan ta keda dentro di e presupuesto disponible.

Si tur cos bay segun programa, Defensa ta spera cu e restaurant nobo lo habri no mas trempan cu e di dos kwartaal di 2027.

Esey lo nifica cu como cinco aña lo a pasa entre clausura di e restaurant original y apertura di e reemplaso.

Prioridad

E investigacion tambe ta lanta pregunta mas amplio tocante prioridad di inversion.

Segun FtM, mientras cu a agrega biyones di euro na presupuesto di Defensa Hulandes desde 2016 – un aumento di aproximadamente 17,7 biyon euro – condicionnan basico na trabao pa mariniernan staciona na Aruba a keda sin resolve.

E investigacion ta nota cu dignatarionan bishitante, incluyendo Rey Willem-Alexander durante su bishita na e kazerne aña pasa, no a ricibi cuminda prepara na e tent temporal.

Defensa a confirma pa FtM cu no duna catering di e facilidad temporal durante bishita di rey.

Mientras tanto, mariniernan un biaha mas ta forsa pa depende en parti riba e mesun edificio di acomodacion temporal cu anteriormente a keda considera inadecuado pa motibo di capacidad limita y mal clima paden.

A huur un facilidad adicional pafo di e kazerne, pero segun representante di VBM, Haico Wissink, cita pa FtM, e ta poco usa pasobra e personal, comprondiblemente, ta prefera di keda na e base militar.

‘Un desaster inaceptable’

Wissink, kende anteriormente a maneha e facilidad di cantina na Savaneta, a bisa FtM cu e edificio ya tabata den mal condicion mas cu un decada atras.

E ta recorda repetidamente cera partinan di e restaurant pa motibo di beskem, preocupacion pa higiena, y wairanan electrico exponi bao di unidadnan di airco cu tabata leak. Segun Wissink, e problemanan aki tabata afecta tanto e area di cantina como e cushina bieu.

Awo, na 2026, e ta kere tiki a cambia fundamentalmente. “Ainda e ta un desaster inaceptable,” el a bisa FtM, describiendo e situacion como un ehempel di mal responsabilidad di dunador di trabao.

Su comentarionan ta subraya e preocupacion mas amplio expresa den e investigacion: cu a pesar di advertencianan ripiti, inspeccion, y promesa politico, e condicionnan laboral enfrenta pa personal militar Hulandes staciona na Aruba a keda sin cambio significante.

Cu un solucion permanente ainda al menos un aña leu, FtM ta conclui cu hopi marinier sirbiendo na Savaneta ta keda depende riba facilidadnan cu inspectornan repetidamente a considera inadecuado pa prepara y sirbi cuminda.