Dicon fraccion di MEP ta papia di un tema di iPad di Gobierno sin splica e berdad? Esey ta e pregunta di Parlamentario drs. Marisol Lopez Tromp di MAS, riba e comunicado cu fraccion di MEP den Parlamento a manda, acusando e, di lo a bay cu un iPad di Gobierno, ora cu el a baha como Minister.

Lopez Tromp ta haya ironico con fraccion di MEP ta trece e tema aki cada biaha, hasta despues cu el a duna un splicacion amplio den Parlamento riba e acusacion falso aki, Lopez Tromp a bisa Bon Dia Aruba.

“Tur hende por corda con nan a saca mi como Minister y a kita tur carchi di swipe pa drenta Cocolishi mesora,” lider di MAS a bisa. “Mi no por a drenta, mi no por a ruim op, mi no por a haci ningun inventario.”

Mas ainda, e iPad tabata di e ex Minister prome cu Lopez Tromp, esta sr. Otmar Oduber cu el a haya pa traha cune. “Riba dje, ami no ta usa iPad ni laptop pa traha riba dje. Nos tin derecho pa haya uno como Minister y como Parlamentario, pero ami ta traha cu mi telefon. Nan ta haci comosifuera cu ami tin gana di cos, cu ta algo ridiculo.” E ex Minister a enfatisa cu el a entrega tur locual tabata den su oficina. Pa colmo, el a ricibi un lista di inventario despues di un aña. “Despues di un aña, ta haci un inventario despues cu pushi y cacho a drenta e oficina? Ami no mester di e materialnan ey. Locual mi tabatin mi a entrega, incluso e iPad cu ta un di e prome cosnan cu mi a entrega. Pero awor nan ta bisa cu nan no tine.”

Den concepto di Lopez Tromp, e fraccion ta busca forma pa desvia atencion di casonan di corupcion di miembronan di e partido, manera ta e caso di e certificado di vacuna y e contrato di Eagle LNG cu WEB. “Si berdad nan ta kere cu ami tin un iPad di Gobierno na cas, nan mester entrega un keho y laga autoridad bin busca. Si nan ta asina avanza, nan por busca e iPad usando tecnologia. Cuidou cu si nan haci’e, nan lo haya e iPad den Cocolishi mes.” iPad y iPhone, mescos cu computer di Apple tin e asina yama ‘find my device,’ cu ta duna indicacion unda nan ta.

“Pero ami lo no sa ken lo por tin e aparato. Locual mi ta haya increibel ta cu cada biaha nan ta traha storia. Ami ta mas interesa pa sa con un lider di fraccion di MEP, drs. Shailiny Tromp Lee, sin cu ta usa su number, ta manda un relato di prensa riba locual por a pasa den Cocolishi. Fraccion mester sali bisa ta riba kico nan ta basa e asunto aki.”

Bon Dia Aruba a tuma contacto cu lider di fraccion di MEP pa puntra si tin prueba cu berdad drs. Lopez Tromp a keda cu e iPad y si a haci un denuncia pa por yega na e aparato. Te cu ciere di nos edicion, no a ricibi reaccion. Pa Lopez Tromp, e ta kere cu e tipo di publicacionnan aki di fraccion di MEP ta pa hala atencion for di problemanan cu Gobierno di MEP y Raiz tin.

LEAVE A REPLY

Please enter your comment!
Please enter your name here