E siman aki e Comision Fiho di Parlamento di Asuntonan Social, Famia, Cuido pa nos Grandinan y Hubentud tabatin e placer di ricibi miembronan di Parlamento Hubenil.

Presidente di e Comision Fiho, Marisol Lopez-Tromp a invita e miembronan di Parlamento Hubenil pa intercambia di pensamento riba e temanan di asunto social, famia, cuido pa nos grandinan y tambe hubentud. Esunnan di Parlamento Hubenil cu tabata presente ta Leonardo Figaroa, Giovanna Carisal y Dominique Lopez, cu ta miembronan di directiva tambe.

Lopez-Tromp a indica cu e reunion tabata uno extenso y den bon cooperacion cu otro unda a sobresali e importancia di e temanan aki y con hopi atencion nos hobennan cu den futuro lo ta e lidernan di nos pais tin pa nan.

E parlamentario ta sinti su mes hopi orguyoso di mira con un fundacion manera Parlamento Hubenil cu a wordo lanta na 2003, tempo cu e mes tabata minister, a desaroya na un manera asina positivo y ta sigui conscientisa nos hobennan riba tur loke ta sosode rond di nan.

Nan ta un plataforma hubenil cu ta crea un forma nobo di liderazgo, ta desaroya y promove e proceso democratico entre nos hubentud. Igualmente ta duna atencion na e cultura di debate, ta promove participacion y ta yuda nos hobennan tin mas confiansa den nan mes.

Marisol Lopez-Tromp ta finalisa bisando cu e ta spera cu e tipo di reunionnan aki por sigui tuma luga unda tanto e parlamentarionan ‘grandi’ como e parlamentarionan hubenil por comparti nan opinionnan, puntonan di bista, preocupacionnan, sugerencianan y visionnan cu otro y asina logra un miho bienestar pa nos isla.

 

1 COMMENT

  1. Now, riba otro noticieronan ta bisa cu na Aruba bo ta haya droga tur caminda: ki ora nos ta stop di saca potret bunita, hunga mooi weer y cuminsa caba cu e droga?

LEAVE A REPLY

Please enter your comment!
Please enter your name here