E lider di partido MAS tambe tabata presente den apertura di Aña Parlamentario 2021-2022 na unda a duna un declaracion pa Bon Dia Aruba pa loke ta trata presupuesto, landspakket y ausencia di un parlamentario di fraccion di AVP.

Faltando tres luna pa fin di aña, ainda no tin presupuesto cu tabata supone di ta cla 1 di september pero esey no a pasa y aña parlamentario a habri, con Lopez-Tromp y su partido ta mira esaki. El a declara cu nan ta mir’e cu hasta presupuesto di e aña akinan mes a wordo trata super laat, ta e ora cu nan mes tabata den parlamento siendo cu e mester ta trata aña pasa prome cu aña a bolter.

“Ma critica esey tambe pasobra con cu bay bin gobierno no por a haci inversionnan importante, entre otro den educacion pasobra, sin un presupuesto aproba, bo no por haci un inversion, den caso aki nos a trata e presupuesto recien di e ultimo lunanan cu ta resta, manera cu ta pinta aworaki e no ta mustra di ta bay ta e caso pero nos lo keda critico riba e proceso aki”, el a sigura.

Ademas, plannan pa aña 2022 y siguiente añanan lo ta marca pa plan di reforma cu COHO lo supervisa, e puntonan global mas importante ta conoci manera reforma fiscal, restructuracion di aparato publico, cambio den ley laboral, tambe a puntra Lopez-Tromp con MAS ta mira esaki y el a afirma cu den nan programa di partido nan a pone hopi cla cu nan ta kere cu despues cu minister presidente a firma e landspakket dia 13 di november di aña pasa, nan ta kere cu ta tempo pa drecha loke tin cu drecha.

“Lamentablemente cu un cuchiu di Hulanda e mester a firma, Aruba no tabatin placa, mester a haci fiansa cu condicion, pero mi ta kere si cu tin hopi aspecto den dje cu den transcurso di aña nos mesun mundo politico mester a haci, tin biaha tin cosnan aden cu no ta popular pero bo no por keda hala nan pa futuro, pa bo yiunan y nieto haci nan, kiermen, nos a pone esey den programa di partido y nos a papia abiertamente di esaki na tur ocasion cu nos ta kere cu mester wordo ehecuta, esey ta e placa cu ta bay tin pa dirigi nos pais pasobra pa pretende cu ta un presupuesto a wordo aproba cu tin yen cos por wordo haci, no ta berdad, ta cortamento tin”, Lopez-Tromp a bisa.

Di loke ta trata ausencia di parlamentario Benny Sevinger di partido AVP, el a menciona cu no sa e motibo pakico e no tabata presente na parlamento ayera y ademas a expresa cu cada parlamentario sa cu ayera cada un di nan tabata invita y ta keda na cada un pa bin of si por bin, den caso aki e si ta acudi y ta sinti su mes orguyoso di por ta back den parlamento pa motibo cu manera el a sigura, aña pasa tabatin varios parlamentario eynan cu a vota pa baha Lopez-Tromp di su funcion, “mientras cu ta bringa pa combati corupcion, nan a dicidi diferente hunto cu e ex-presidente di parlamento cu awe por cierto no t’ey pasobra Sr. Thijsen te momentonan aki nos no sa si ta bay forma parti di parlamento”, el a afirma.

Ademas el a trece dilanti cu 4.191 persona a vota p’e den eleccion pasa a pone cu e tin un stoel mereci den parlamento y cu e lo no defrauda nan.

LEAVE A REPLY

Please enter your comment!
Please enter your name here