Ayera Aña Parlamentario 2021-2022 a cuminsa cu e presencia di parlamentarionan y ministernan nobo y esun cu te ainda no a laga nan funcion, tambe cu e presencia di su excelencia Gobernador Alfonso Boekhoudt.

Despues di discurso di gobernador, prensa a haya oportunidad pa haci algun preguntanan na unda cu Bon Dia Aruba a puntra pa Ursell Arends lider di partido RAIZ cu faltando tres luna pa fin di aña, ainda no tin presupuesto cu tabata supone di ta cla 1 di september pero esey no a pasa y aña parlamentario a habri, con su partido ta mira esaki?

Arends a menciona cu como coalicion di gobierno nobo nan a ricibi un presentacion siman pasa for di Directie Financien na unda cu nan a haya un splicacion con e presupuesto 2022 lo wordo hinca den otro y na unda e ta na e momentonan aki, aworaki “un bes cu gobierno y nos como minister nobo lo huramenta, nos tin cu bay canalisa esakinan hunto cu cada ministerionan pa termina esaki y por bin parlamento” el a señala.

Mirando e schedule cu departamento di Financien tin hinca den otro, nan ta premira cu na januari 2022 esey lo yega parlamento, tambe el a comenta cu nan sa cu e intencion y legalmente nan kier pa esey lo ta prome cu september pero “lamentablemente e aña aki, esaki no ta e caso pero como parti di e coalicion nos lo percura si cu pa 2023 nos lo cumpli cu e deadline pa fin di september e begroting 2023 lo ta den parlamento”, Arends a afirma.

Ademas, plannan pa aña 2022 y siguiente añanan lo ta marca pa plan di reforma cu COHO lo supervisa, e puntonan global mas importante ta conoci manera reforma fiscal, restructuracion di aparato publico, cambio den ley laboral, tambe a puntra Arends con RAIZ ta mira esaki y el a contesta cu gobernador den su discurso a trece dilanti cu mester sigura e pilarnan democratico y trece esey den balans na Aruba.

Nan como partido sa cu landspakket ta prescribi algun cambionan structural cu nan mester implementa pero, “nos ta wak tambe oportunidadnan grandi pa pais Aruba y trahando den union nos por logra esakinan y esey ta loke e discurso di excelencia gobernador a trece awe pa ban traha den union, akiden nos por debati den parlamento, debati den un forma sano pero ora nos sali afo nos mester ta uni pa nos por surpasa e desafionan cu e pandemia aki a crea pa nos”, el a sigura.

Asina mes, el a declara cu nan mester sigura transparencia y integridad pa asina crea confiansa back den gobierno pero tambe den gobierno pa comunidad pa kere den nan ekipo profesional, “esey ta netamente loke nos ta bay logra, como RAIZ cu ta parti di e coalicion, nos lo zorg pa nos tin un ekipo di un bureau cu ta traha organisa y asina aki kere den aparato publico, en bes di busca coordinadornan nos lo usa e directornan como nos conseheronan pa asina nos por empuha nos isla”, Arends a bisa.

Dianan pasa tambe el a papia tocante un gobernacion horizontal, pa cu esaki el a declara cu e forma tradicional di traha ta cu ta haya 8 of 9 minister como un toren riba nan mes, tur loke ta cay como por ehemplo, riba Enseñansa, ta un toren “ningun no tin comunicacion of ningun input di otro ministerionan y esaki ta manera cu nos lo kier trece cambio, mi sa cu nos a scucha critica di nos contrincantenan politico, pasobra e forma nobo di traha y di goberna aki, tin e politiconan tradicional confundi, un bes nos cuminsa desplega esaki, e ora ey tur hende lo compronde” el a finalisa.

LEAVE A REPLY

Please enter your comment!
Please enter your name here