4jun, NW, mark calor.jpg

Den e ultimo dianan aki na Aruba, tin hopi biento pero asina mes e calor ta inmenso. Sr. Mark Oduber, hefe di Departamento Meteorologico, a indica cu pa motibo di e presion abou y halto aki na Aruba ta sintiendo bientonan fuerte, pero e calor ta keda algo normal. Pero pa motibo cu e modelonan ta bay boltia, e temporada di yobida lo tin chens di aumenta. E situacion cu Aruba ta mas calor, Departamento Meteorologico ta mira cu esaki ta birando mas calor cu normal.

 

E biento fuerte cu ta sintiendo na e momentonan aki ta bin pa motibo cu tin un presion abou banda di Colombia y combina esaki cu e presion halto banda di lama Atlantico, ta causa cu e straal di presion di biento ta duro. Esaki ta pone cu ta haya e biento modera cu ta fresco. Pa loke ta e calor, segun sr. Oduber, esaki ta algo normal. Si tira bista riba e pronostico di termino largo di awo bay te cu october, e modelnan ta indica cu e condicionnan ta faborabel cu Aruba ta un tiki mas calor cu normal. “Loke si ta interesante ta cu bo ta bay wak cu e periodo di augustus, september y october e modelonan ta bay boltia,” segun sr. Oduber. Esaki ta un indicacion cu probablemente e chens di yobida aki na Aruba lo bay aumenta y e por ta hasta di normal. Esey ta un cambio basta grandi compara cu e ultimo dos (2) aña.

 

Isla ta mas calor

Hendenan ta keha cu e calor ta demasiado y ta puntra si pa otro aña e calor lo sigui asina of si lo bira menos calor. A puntra sr. Oduber si ya caba por cuminsa pronostica cu otro aña lo ta calor of si no por haci esaki. El a indica na Bon Dia Aruba cu ta complica pa bisa esaki. Pero mirando e ultimo añanan na Aruba, Departamento Meteorologico ta mira cu e isla ta kedando mas calor cu e normal den e ultimo 30 aña. Pero si awa yobe, e temperatura por baha un tiki. “Manera mi a indica, e modelnan ta indica cu e chens pa awa por aumenta den e periodo augustus, september y october. Pero tur cu tur e temperatura ta keda riba normal,” el a indica.

LEAVE A REPLY

Please enter your comment!
Please enter your name here