4Jun, JO, Dump1 (1).jpg

Parlamentario Xiomara Ruiz Maduro hunto cu colega Dangui Oduber a bishita Parkietenbos diabierna mainta pa asina tira un bista y comparti cu pueblo di Aruba e situacion deplorabel cu tin actualmente na Dump. A discuti cu gobierno a gasta 17 miyon florin pa pone e pipa nan pa EcoGas por cuminsa cu un proyecto nobo pa converti sushi den gas pero cu esaki tampoco a resulta anto pueblo di Aruba ainda no a haya un splicacion di esaki ainda, y aworaki a keda sin solucion mientras mantencion na dump keto bay ta sigui bay atras.

Sra. Maduro ta conta Bon Dia cu nan ta uzando rednan social pa por yega na informa hende cu kisas no sa exactamente kico tur ta pasando . “Hopi hende no ta wak noticia of lesa corant pa algun of otro motibo, pero hopi hende ta bay riba Facebook si ultimamente pa haya nan noticia. Aworaki cu Facebook tin e opcion pa bo bay ”Live”, nos a dicidi di probecha di esaki pa por ehempel bay cana den dump pa hende mira cu nan mesun wowo ta con malo e situacion ta eynan actualmente,” sra. Maduro ta comenta.

Sra. Maduro ta bisa cu hopi hende ta gusta e idea di bay ”Green” pero cu en berdad esaki no ta locual ta pasando actualmente na dump. “Mi tambe ta gusta e idea pa haci dump mas sostenibel y cambia e sistema na uno mas “Green,” pero locual cu gobierno ta haciendo aworaki no tin nada concreto. Na dump, a cuminsa cu un proyecto cual no tabata ta e solucion pa tur problema , pero si un bon solucion pa reduci e volumen di sushi. A boycott e proyecto aki den 2009 y e inversion di 28 Miyon florin ate para eynan, anto riba dje, Bouldin & Lawson a hiba gobierno di Aruba corte y manera mi a compronde, nan a bisa pa nan wak pa yega na un solucion na mesa paso eigenlijk Gobierno ta perdi den e parti akinan pasobra den momento cu Bouldin & Lawson mester a entrega e proyecto, nan a stroba nan di haci esaki pasobra nan tabata tin otro plan,” sra. Maduro ta bisa. 

E plan di gobierno segun sra. Maduro tabata ta entre otro cu bo ta haya EcoGas cu ta bini anto kima e sushi pa converti esaki den gas anto e gas aki ta bay W.E.B. pero esaki tampoco no a resulta.
“Nos no tin nada den e momento nan aki mientras nos tin un dump bayendo atras den mantencion, si bo mira e proyecto cu tabata tin tempo di Bouldin & Lawson tabata consisti di entre otro cu despues lo por bin un ampliacion caminda cu ta bay over na kima e otro tipo di sushi nan, pero door cu e prome fase mes no a caba cun’e ta bira dificil pa sigui, pues aworaki nan no tin ningun solucion concreto  pa e problema aki,” sra. Maduro ta bisa Bon Dia.

 

Mester inicia proyecto nacional di separacion di sushi
Sra. Maduro ta agrega cu mester crea un conscientisacion nacional ariba e importancia pa nos haci un reciclahe , y tambe pa nos traha un sistema pa separa e sushi mescos cu tin na Hulanda.
“Nos mester crea un consenshi ariba e necesidad di esaki pero tambe cu nos ta pone den practica caminda cu tin un plan nacional di reciclahe. Hunto cu esaki, e ora ey claramente bo mester di un dump cu ta funciona. Tin un proyecto di locual Aruba a paga 28 Miyon di florin pe caba, kemen eynan caba ta algo cu nos mester analisa como parti di solucion, anto un otro parti cu ami ta kere ta importante pa Aruba ta pa por ehempel tin ‘kringloopwinkels’. Sea ta algo cu gobierno ta haci e of algo priva, den todo caso, tin hopi sushi cu nos ta benta afo cu por haya un bida nobo,” sra. Maduro ta bisa.

Sra. Maduro ta agrega cu aworaki tin hopi hende ta benta cos afo cu otro hende por haci uzo di dje manera paña of cualkier forma di muebleria. “Te na mi conocemento, Aruba no tin un forma di “Kringloopwinkel” cu nos por haci uzo di dje caminda por hiba sushi cu ainda por wordo recicla. Esaki ta algo cu por duna sigur un bon resultado cual ta parti di e solucion di e problema aki di sushi na Aruba.”

Sra. Maduro ta agrega cu aworaki mes sr. Donny Rasmijn tin un proyecto pa pone un stop na locual ta saco di plastic na supermercado nan cual e ta bisa tambe ta un bon idea, y e ta forma parti di e solucion y paso nan cu mester tuma. Aunke cu ta bisa cu na Parkietenbos so ta permiti pa tira sushi, segun sra. Maduro, papiando cu e hende nan el a haya sa cu ta tirando sushi na Moko tambe. E ta splica cu ta rosa caminda y ta uza esaki pa tira sushi tambe aden. “E iniciativa cu sr. Donny Rasmijn ta tumando cu esaki ta realmente con nos por cuminsa traha pa ta un Aruba sostenibel, pero e manera cu nos ta bayendo awo ta totalmente incorecto y inaceptabel,” sra. Maduro a bisa.

LEAVE A REPLY

Please enter your comment!
Please enter your name here