Durante un entrevista exclusivo cu Bon Dia Aruba a tene cu parlamentario y lider di fraccion di AVP, Marlon Sneek tocante maneho di gobierno di Aruba pa loke ta trata e crisis di Covid-19, el a sigura cu nan como partido ta lamenta cu cada biaha crisis team ta tira culpa riba comunidad.

Pa esaki, el a menciona cu na momento cu nan como gobierno a tuma e decision di habri frontera, tambe ta nifica cu lo importa e malesa di Covid-19. Y den su concepto nan lo mester tabata hopi miho prepara y garantisa pa tin un bon control, pa e ora ey no expone e comunidad na posibilidad di contagia nan mes cu e virus.

Pa Sneek esaki ta lo contrario. Loke por a mira ta cu segun e na aeropuerto tabatin ken ta haya e contract di bende seguro. Esaki ta parti cu a sobresali y a laga pueblo desampara. Tambe a señala cu den conferencia di gobierno por scucha cu si un hende awe ta asintomatico den dos of tres dia e malesa por manifesta su mes. Esaki ta dunando un indicacion cu e forma cu a scoge pa bay atende cu e malesa aki, ora e turista ta yega Aruba ta test y bis’e si ta positivo of negativo, no tabata e manera corecto pa atende cune.

“Ta miho pa bo lo a laga e hende ey test como un regla cu cuater of cinco dia prome cu bin Aruba y asina mira e resultado. Pero esey tampoco no ta un garantia, den nos concepto esey a faya, cu no tabatin un bon control”, Sneek a comenta.

Pa loke ta trata e seyo di higiena na companianan, caminda cu un hende cu ta traha den cushina tur dia y lo mester haci e luga limpi, no ta pa motibo di control pa keda ‘Covid-19 free’ of liber di contagio’. Esey pa nan como partido tabata falta, y ora cu a introduci e apertura back cu a pone cu tur negoshinan mester cera 11or, “nos tur sa cu rond di Aruba tabatin yen di otro actividad cu tabata sigui sin tene na cuenta distanciamento social”, Sneek a sigura.

El a continua bisando cu si lo a laga e luganan habri den orarionan normal, tur hende lo a sigui bay pa bar, discoteca y restaurant. Aki gobierno como autoridad por controla hopi miho con e hende ta comporta su mes. Si no tin hende pa controla na porta, of si no tene cuenta pa separa e hende un meter y mey for di otro por ehemplo, asina por sanciona y pone atencion riba lo cual no tabata bon. “Pero na momento cu ta pusha e hendenan pa bay haci cosnan un tiki mas scondi, pasobra tur luga mester cera 11or, bo mes a crea cu e hende ta bay den peliger.”

Di loke ta trata e cifranan na e momentonan aki, Sneek a trece dilanti cu esaki ta un problema cu ta afecta Aruba den su totalidad. Segun e, otro punto cu gobierno a duna pa tercera tabata e oportunidad pa por haci testnan. Den nan concepto e testnan ey mester a keda central cerca gobierno, pa motibo cu “un hala di cosnan bo ta tende”, el a manifesta.

Ademas el a enfatisa cu Departamento di Salubridad Publico ta informa cu si un hende ta sali positivo mester keda na cas shete dia y despues di esey, si no ta sinti nada mas, e persona tin cu bay traha. “Si e hende ta keda mas di shete dia, e no ta haya e dianan paga como un AO”, kiermen e hende bon of malo tin cu bay traha, pa motibo cu no tin entrada.

Di mesun forma, Sneek a puntra basa riba kico di nan a cambia di 14 dia e cuarentena a bira pa 7? Esaki ta nifica cu nan mes ta exponiendo e hendenan. “Mi ta kere cu na dado momento nos mes ta creando… door di mi no sa si ta pa spaar test y placa, cu di e manera ey ta exponiendo e comunidad.”

Pa finalisa, e problema cu segun el a declara tambe ta cu tin hopi hoben cu a wordo contagia y hopi di nan no tabata sa mes cu tabata contagia. Y asina nan a hib’e e virus pa cas di nan mama y welanan. E ta un cos cu ta birando den nan concepto ‘preocupante’, pa motibo cu nan no ta mira un paso di gobierno pa atende lo cual cu tin cu ta pasando na e momentonan aki cu Covid-19