(AFP)—Entrenador di Maroco, Mohamed Ouahbi, a bisa cu su hungadornan mester kere cu nan por bira e prome campeon Africano di Mundial despues di avansa pa e ultimo 32 equipo sin perde ningun partido.
E Atlas Lions a bin back dos biaha pa derota Haiti 4-2 diaranson y a termina segundo den Grupo C solamente pa diferencia di un gol cu Brasil.
Un bataya contra Hulanda, Hapon of Suecia ta sperando nan na Monterrey dialuna.
Maroco a bira e prome pais Africano pa yega te semifinalnan di Mundial cuatro aña pasa na Qatar.
Ouahbi, kende a gana Mundial under-20 cu Maroco aña pasa, ta kere cu e por ripiti e logro ey cu e seleccion mayor. “Maroco a drenta den un dimension completamente nobo. E hungadornan, e fanaticonan ta kere den nan equipo y nos oponentenan ta respeta nos equipo,” el a bisa tocante nan progreso riba escenario internacional.
“Nos mester kere den e obhetivo aki, e meta aki (di gana Mundial). Nos mester duna tur loke nos tin, respeta nos oponentenan y compromete nos 100 porciento na e ambicion aki.
“Mi ta kere hopi den mi trabao y e trabao di mi personal, y nos tin tur e ingredientenan pa bira e mihor nacion.”
Hulanda ta e oponente mas probable di Maroco den e siguiente ronda.
“Mi no tin preferencia. Nos lo mira mañan cu ken nos lo hunga,” Ouahbi a agrega.
“Nos lo hunga e partido ey cu e mesun obhetivo y confianza.”
Aunke Haiti a keda elimina sin gana ningun punto, su actuacion den su prome Mundial desde 1974 a yena un nacion afecta pa pobresa cu orguyo.
Les Grenadiers a marca nan prome golnan di Mundial den 52 aña ora un auto-gol di Yassine Bounou y un gol espectacular di Wilson Isidor a duna nan e bentaha dos biaha na Atlanta.
“Mi ta decepciona cu e resultado, pero mi no a sinti cu mi hungadornan a entrega nan mes,” coach di Haiti, Sebastien Migne, a bisa.
“Nan a representa e pueblo Haitiano, cu nunca ta entrega su mes.
“E equipo a representa Haiti cu hopi distincion.”
