Algun siman a tras directora Sonja Velthuizen a tuma su retiro, Camara di Comercio y Industria Aruba (KvK) ta informa den un comunicado. E motibonan ta personal. Velthuizen a dicidi cu, despues di 8 aña na KvK, di cua e ultimo 4 aña e la funciona como directora di KvK, e ta bay pa un reto nobo.

Velthuizen a informa KvK di su decision cu basta luna di aviso pa KvK por tin tempo pa apunta un director nobo.

Director nobo di KvK
Segun e comunicado cu Bon Dia Aruba a ricibi ta indica cu KvK a informa cu Martijn Balkestein lo reemplasa Velthuizen, como Director nobo. Balkestein ta un persona cu ta conoci pa su carera largo den ramo di economia y estadistica, cu a eherce cu profesionalismo y integridad. Den pasado el a fungi como director di CBS y tin conocemento amplio riba e tereno di economia y data analisis. Esaki ta importante, mirando cu KvK lo kier trece mas informacion dilanti a base di analisis di datonan di registro y e mercado.

Anteriormente caba, Balkestein tabata un di e candidatonan potencial cu a solicita pa e puesto di director. E biaha aki den e proceso nobo pa reemplasa Velthuizen, KvK a acerca e.o. su persona pa wak si e ta dispuesto pa asumi e reto y el a acepta.

Reto nobo den sector priva
Velthuizen lo continua su carera den sector priva. E no tabata un decision facil pa Velthuizen, mirando cu den transcurso di e añanan cu el a traha na KvK, el a crece y bira un persona hopi respeta y admira pa su maneho. Como directora di KvK, e tabata semper na vanguardia di e empresario local y a yuda trece sector priva y sector publico mas cerca di otro, pa bienestar di comercio di Aruba. Tambe e la hisa e perfil internacional di KvK, cu entre otro, e organisacion di Kamers van Koophandel di Caribe Hulandes, relacionnan productivo cu KvK di otro paisnan di region y Merca, y tambe participacion na eventonan internacional cu a yuda trece innovacion den KvK.

Coleganan y directiva di KvK sigur ta desea Velthuizen hopi exito, y ta gradici Sonja Velthuizen pa tur e experiencia y conocemento cu a comparti den e ultimo añanan.

KvK lo continua bou maneho di un director nobo cu sigur lo continua cu e bon trabou cu e director anterior a sa di brinda.

 

LEAVE A REPLY

Please enter your comment!
Please enter your name here