Mas accion na caminda contra prostitucion ilegal

Trudy Hassel a bisa cu for di cu su persona hunto cu sr. Matos a keda  nombra na departamento di IASA y Warda Nos Costa,  nan ta purbando diligentemente pa ‘tene cuenta cu varios principionan’.

Un di na nan cu sra. Hessel a referi na dje ta e principio di ‘proporcionalidad.’ El a splica cu esaki kiermen, nan no ta yega cana kibra y actua di un forma contra ley.

Tambe nan ta tene cuenta cu e principio di ‘subsidiariteit’ cu ta basicamente mesun cos, e di. Igualmente el a laga sa, cu prome cu un accion ta tuma luga, su persona mes ta informa y corda e personal di Warda Nos  Costa riba  aspecto di respet y con pa atende cu e persona debidamente.

Den presencia di minister di Husticia, Andin Bikker,  sra. Hassel a referi na e accion cu Warda Nos  Costa  a realisa durante fin di siman, specialmente na San Nicolas. Durante e accion aki alrededor di 23 hende muhe di bar cu ta eherce prostitucion a keda deteni. Nan a  conduci e grupo aki  na nan sede, pa realisa e respectivo control riba nan status legal.

“Tur e persona a pasa door di e control di computer pa wak si tur su papel ta na ordo”, e di.

E accion a wordo plania a base di tipnan of informacion cu Warda Nos Costa ta bin compilando durante varios siman.  Nan a dicidi cu a bira tempo pa realisa un accion riba cierto terenonan, entre nan esun di prostitucion ilegal.  No solamente na San Nicolas, sino tambe na Oranjestad y e sector turistico.

Control na San Nicolas
Segun sra. Hassel, inicialmente nan intencion tabata pa realisa e control den otro area na San Nicolas.  Pero na momento cu nan a pasa den caya grandi na San Nicolas, nan a mira un grupo grandi di e damanan aki, para afo riba caminda publico. Na e momento ey,  nan no por distingui cual di nan ta trahado legal of ilegalmente.  Igualmente el a bisa nos ley ta prohibi pa e profesion aki por wordo haci riba trottoir of rond di e establecimento, cu nan tin un permiso pe. P’esey nan a dicidi di realisa e control aki di biaha.

El a bisa cu lamentablemente,  ora cu  su persona  a acerca un di e doñonan di bar pa haya e lista di e damanan cu tin permiso pa eherce prostitucion,  pa asina nan por controla debidamente, e no a haya e colaboracion aki. “Mi a wordo nenga”,  e di. Tambe e doño di e bar a referi pa e check cu Dimas. Ya cu e no a haya e lista aki, el a bisa cu su mes a sinti obliga di transporta e damanan aki  pa Warda Nos Costa,  pa controla nan status. El a agrega cu  el a informa debidamente na e doño di e bar.

A pesar cu e  proceso di control ta tuma tempo, nan a haci di un forma  rapido,  pa asina esun cu ta pasa e control bon, lo por bay bek na pia di trabou mesora. El a referi na e denuncia cu a bin fei e operadornan di e bar na San Nicolas, caminda net esunnan cu ta traha di forma legal ta wordo perhudica, mientras cu den nan  bisindario, tin casnan cu ta opera ilegalmente den e negoshi di prostitucion, pero nada ta wordo haci.

El a bisa cu un dia despues, cual ta diasabra ultimo,  nan a bay haci e control aki  dos caya mas patras di e caya unda e actividad aki a tuma luga, y nan a controla e damanan aki. Pero contrario na loke a wordo denuncia, e damanan aki nan papel tabata na ordo, y pa motibo di esey no tabatin motibo pa detene nan. “Pasobra tur cos tabata bou control. Pero nos a controla tambe”, e di.

Controlnan lo sigui
El a indica cu ora tin e tipo di control asina, tur hende ta adverti otro, y un ta bisa otro. Eventualmente, e hendenan aki a wordo adverti prome cu Warda Nos Costa a bay realisa e control aki. Pero sra. Hassel no ta descarta cu nan ta sigui cu nan control, no solamente den e parti cu nan a haya informacion cu tin  prostitucion ilegal, pero den full otro area na San Nicolas.

Tambe el a referi na e parti caminda ta wordo bisa cu Warda Nos Costa ta mal uza nan poder of autoridad,  na momento cu nan ta realisa e tipo di razzia aki.  Durante nan control di diasabra na San Nicolas den e cayanan patras di e Main street, e mes a duna ordo pa cera un rato un pida di caminda ‘cortico’, di mas of menos 10 meter,  pa realisa e control y sali inmediatamente.

El a hacie ya cu e tin autoridad pa realisa esaki como ‘bevoegdheidsambtenaar.’  Esaki ta un forma pa evita –segun sra. Hessel cualkier discusion cu otro persona cu ta den e caminda ey tambe. El a afirma cu nan a cera e caminda un rato,  y despues nan a bay.

Igualmente el a laga sa cu fei cu nan a drenta Warda Nos Costa, nan a cuminsa atende cu varios asunto cu a keda pendiente, entre nan e tipo di control aki contra personanan cu ta kedando ilegal riba nos isla.

 

You May Also Like

AZV: “Semper nos fondonan lo ta limita”

AZV ta laga sa cu semper nan fondonan ta bay ta limita anto cu ...

IMG_0678.JPG

Fundacion Adopt an Addict ta entrega premio

Recientemente Fundacion Adopt an Addict a entrega e premionan di e campanja di fundraising. ...

tropical-wave.jpg

Ultimo informacion: Ola tropical no a desaroya den un horcan, pero por spera awacero pisa

Ultimo informacion cu a drenta via Departamento Meteorologico ta cu e tempo ta ubica ...

Despues di 25 aña: 33 truck militar nobo pa marina

Mester a warda 25 aña pa Commando Zeemacht in het Caribisch gebied (CZMCARIB) haya ...

‘Pronto e odisea di 14 aña pa e di dos grupo caso Setar lo yega su fin’

Algun luna atras parlamento di Aruba a aproba un ley unda ta duna autorisacion ...

Preparacion den fase final pa edificio nobo pa SPO Pariba

Siman pasa Minister di Enseñansa, Michelle Hooyboer–Winklaar a reuni cu Directie Onderwijs, DOW y Director ...