‘Mas cu 200 miyon pa cumpra terenonan bek riba cual no por construi’

Terenonan eigendom cu cay den areanan unda no por construi segun ROP ta crea un problema pa tanto gobierno como su ciudadanonan mirando cu ta dificil pa intercambia un tereno pa otro segun e cantidad di tereno disponibel, pero pa cumpra esakinan bek lo costa mas cu 200 miyon florin, segun minister di infrastructura y medio ambiente.

Durante un conferencia di prensa di gobierno e siman aki minister di infrastructura y medio ambiente Otmar Oduber (POR) a indica cu den un cantidad di casonan cu a bin dilanti riba otorgamento di tereno den areanan natural manera saliña hues a supla riba dede di gobierno pa no a bin suficientemente prepara.

Esaki tabata minister su contesta riba un ponencia di colega di prensa di portal NoticiaCla cu a trece dilanti cu den varios di e casonan aki cu a bin dilanti, hues ta mustra cu e trabou cu abogado di gobierno a haci no a cana bon. Y cu esaki lo ta un manera pa por keda ‘bon’ politicamente cu e otro partido.

Ademas sr. Oduber a agrega cu ‘Directie Wetgeving no por haci nan trabou pasobra no tin informacion na DIP di kico e minister a compromete y kico no’.
E minister e ora ey a cuestiona si e minister anterior a actua corectamente, ‘dicon no a laga e filenan den e departamento? Pa ora nos bay corte tin e documentonan necesario’.

Ta berdad cu hopi biaha nos no ta suficientemente prepara, pero nos ta perde caso pa esey. Hues ta mustra riba e echo berdad cu ta straño, y mi tambe ta hay’e cu gobierno no tin documento, pero esey ta e realidad.”

E casonan aki ta trece dilanti e cuestion di e maneho di ROP y e manera con esaki ta hancra den ley di LRO. Mirando cu tin indicacionnan cu lo bay proteha e 16 areanan di naturalesa na Aruba, aunke no tin un indicacion di ki tempo esaki lo bay tuma luga, con esaki lo bay ta hinca den otro?

Minister a contesta bisando cu ‘e maneho di ROP nunca por a wordo cambia’. E maneho aki no ta fiha pa minister, si no cu e ta fiha pa e ley di LRO. “Ley di LRO ta bisa cu ROP ta un maneho cu ta existi pa 10 aña y pa bo cambia e maneho ey bo tin cu cana henter un proceso, y hues a duna mi rason den e echo cu esaki nunca por a wordo cambia sin cana e caminda.” Segun minister e gobierno anterior a crea un percepcion eroneo di kico ta proteha y kico no ta proteha por medio di comunica cu e ley aki tin falta di e reglamentonan pa mustra con ciudadanonan y companianan tin cu anda cu terenonan (voorschriften).

Propio ley pa protege 16 areanan di naturalesa y 3 arkeologico

E 16 areanan cu lo ricibi proteccion como areanan di naturalesa sinembargo no lo cay bou e maneho aki ni e ley. Segun minister, lo amplia esaki na 19 areanan tumando na cuenta cierto aspectonan arkeologico y esaki lo bin den su mesun ley.

Den e manera cu esaki ta hinca e maneho ta pone un obligacion pa no bay en contra di dje solamente pa ambtenaar, y no publico en general.

E ciudadano no por haya su derecho si e ambtenaar haci su trabou. Kiermen bisa cu no tin control y proteccion di nos teritorionan pasobra no tin voorschrift no ta berdad. Pasobra un ambtenaar cu ta haci su trabou nunca lo actua en contra ROP. Pasobra e ta castigabel. Loke ta tumando luga awo cu investigacionnan den DIP y DOW ta pa haya sa con por ta posibel cu permiso pa construi a sali di DOW y en contra ROP.”

Un ehempel cu minister a duna ta cu a otorga permisonan pa construi edificio di 7 piso halto den areanan unda ROP ta bisa cu por tin edificio di 5 piso maximo. Sinembargo LRO ta prohibi otorgamento di permiso pa construi en contra ROP. “Y el a sosode! Nos ta weita edificio ki banda mes.”

Pa esaki lo bin un maneho cu lo purba preveni cu otro personanan den futuro lo bay purba haya derecho via ‘decisionnan robes cu e minister anterior a tuma’.

Mas cu 200 miyon pa cumpra bek terenonan riba cual no por construi’
Den mesun rosea e minister a menciona cu e voorschriften lo mester regla un aspecto importante cu e no ta haciendo actualmente. Ora un ciudadano tin un tereno den un area cu no mag construi, lo mester por regla pa intercambia e tereno of percura pa gobierno cumpra e tereno. Esaki segun minister ta perhudica hopi hende. “Pero bo tin cu bay yuda e hende nan ey cu un maneho, sin kibra gobierno tampoco.”

Actualmente no tin espacio pa intercambia tereno mirando cu segun minister e terenonan disponibel pa construi ta 60% den man di priva, mientras 40% ta di gobierno. “Bo no tin espacio. Pero bo no por bay cumpra pasobra bo no tin placa. E cifra mas o menos cu gobierno lo mester tin pa paga pa tur e terenonan eigendom cu ta cay bou ROP ta surpasa 200 miyon florin.”

You May Also Like

IMG_1234.JPG

Candela intencional dilanti edificio di VNO na Aruba

ORANJESTAD – Bomberonan ya caba a paga un candela diadomingo anochi dilanti entrada di edificio ...

Ministerio Publico no kier comenta riba Setargate

Ministerio Publico a confirma na Bon Dia Aruba cu nunca nan a haya un ...

Negoshinan: nos ta cla pa prohibi humamento

Entrante 1 di januari 2017 ta prohibi pa huma den luganan publico. Negoshinan manera ...

5P3A9769.jpg

Chauffeur coriendo iresponsabel a causa un desgracia na Shaba

Dialuna den careda di 5 or mainta polisnan ta keda manda cu urgencia pa ...

image.jpeg

Ezzard Cilie: Prome auxilio casi no por atende cu cantidad di pashent

ORANJESTAD – Actualmente tin un situacion na Spoed Eisende Hulp (SEH), cu tin mucho ...