E instituto CASLA, un organisacion Checo cu ta vigila violacion di derecho humano, a manda dialuna dia 29 di januari 38 denuncia nobo di maltrato y tortura na Venezuela, pa Corte Penal Internacional, estableci na Den Haag, Hulanda. E casonan ta fundamenta riba testimonio di e victimanan.
“E proposito ta pa demostra cu tortura, crimen contra humanidad, no ta para, sino, al contrario, ta birando mas comun”, e director ehecutivo di CASLA, Tamara Suju, cu a manda e filenan cu testimonio pa Den Haag, a bisa prensa na Praga.
“E casonan di e 38 victimanan nobo a drenta Corte Penal den caracter di nomber bao proteccion”, e director di CASLA a clarifica.
Segun e abogado Venezolano, tortura a converti den practica “pa obtene confesion o pa e victimanan acusa dirigente di oposicion, otro civil o militar, di accion supuestamente subversivo.”
Suju a denuncia cu e acoso y represion contra opositornan di presidente Nicolás Maduro a extende te na nan famia.
“Nan ta bay pa e esposa, pa e yiunan y ta hiba nan deteni ora nan no haya e opositornan mes”, y incluso, el a sigura cu “nan ta persiguiendo e abogadonan cu ta atende caso di e militarnan cu a rebeldia.”
Den e denuncianan ta señala e Division General di Contra Inteligencia Militar, dirigi pa coronel José Franco Quintero, como e organismo di seguridad responsable pa e mayoria di e torturanan.
Entre e torturanan aplica ta aparece asfixia cu saco di plastic, aplicacion di descarga electrico, hogamento, golpi y scop na henter curpa y un caso di tortura sexual cu violacion.
