Fundacion Parke Nacional Aruba a obtene e MER di Aruba Ocean Villas sin permiso, y propietario di e proyecto kier su producto back. Asina Osyth Henriquez a bisa ayera durante un conferencia di prensa extenso, riba e tereno di e proyecto hotelero cu ta blanco di hopi atencion.

E conflicto ta e hecho cu Directie Natuur en Millieu, DNM a pasa e MER, e Millieu Effecten Rapportage cu Aruba Ocean Villas a laga traha pa dirigentenan di Fundacion Parke Nacional Aruba sin permiso. Riba dje, esaki despues cu Henriquez a ofrece personal di Parke Nacional Aruba pa bin lesa e MER, pero sin haci copia. Su motibo ta hopi cla. El a inverti 230 mil florin den un MER y realidad na Aruba ta cu otro organisacionnan ta usa investigacionnan profundo di otro pa bende nan mesun analisis. “Si nan kier paga p’e, nan por a hay’e,” Henriquez a bisa.

Henriquez a ilustra e progreso di Aruba Ocean Villas cu a inicia cu compra di un cas na Savaneta cu no tabatin beach, ni tabatin ningun mata di mangel. E tabata banda di un tereno di lodo y un lama susha cu petroleo. Ademas di e petroleo di Lago, hendenan tabata deposita tur sorto di sushedad. E tempo ey, tabata difunto Ing. Jerry Engelbrecht a conseh’e pa cierto momento, tapa e sushedad cu santo y laga vegetacion crece pa asina despues di tempo, naturalesa regenera. Ta despues cu henter famia a traha pa haci terenonan limpi, y a traha un braza den lama cu a yuda cu e mangelnan por a crece.

E proyecto a bin prome, despues e mangelnan a sigui

No a kita ningun mata di mangel pa traha un cabana, Henriquez a sigui splica.

Al contrario, e matanan, esta e mangroven a crece rond di locual a construi. “Asina e mangelnan a crece. Y cada biaha cu un simiya cay, nos ta plant’e den pochi, y despues plant’e.” Segun Henriquez e compania a bira experto den planta mangel entretanto y como tal a lanta O Foundation – cu ta dirigi pa entre otro, educa muchanan di scol na Aruba con pa planta y cuida matanan di mangel y con ta cuida naturalesa. “Nos a traha un beach, y no kier derame, y como tal nos a traha e braza cu ta den lama. Y door di esey, tur e sedimentonan a pega y a permiti e mangroven crece. Y nos a keda cuida nan.”

Osyth Henriquez ta kere cu ta importante pa tur wak e potretnan y mira e cambio, di un luga sin mata di mangel pa uno cu awor hopi hende ta bisa cu mester proteha. Locual e ta lamenta, ta cu algun habitante di Savaneta ta protesta su proyecto, y ta acusa di ta destrui e mangelnan cu e mes a cuida, pero mientrastanto te dia di awe, hendenan ta tira tur sorto di sushi, incluso azeta di restaurant, den lama. “Ami a siña cu ami ta cuida mi medio ambiente. Tur hende cu bin aki ta bisa con bunita e ta. E ta e vibracion, e energia cu ta crea. Hende cu maldad no por crea esey. Y e maldad ey nos no tin.”

Permiso

Un di e criticanan pisa contra Aruba Ocean Villas ta cu e tabata traha sin permiso. Osyth Henriquez ilustra cu a entrega e prome peticion 13 aña pasa, cu tur plannan. Pero contrario na proyectonan di inversionistanan stranhero, esun di dje como inversionista Arubiano tabata keda pega. “Ami ta Arubiano. P’esey e permisonan a tarda asina hopi.” Henriquez ta puntra di con esnan cu ta exigi di dje pa mustra tur documento, no ta bay pidi mescos na tur proyecto di hotel of hasta na su bisiñanan na Savaneta cu tambe ta opera hotel y restaurant, sin cu nan tin permiso. Den su caso, e permisonan a tarda, pero el a haya nan y el a logra cu notario a pasa e terenonan oficialmente pa Aruba Ocean Villas.

Parke Nacional Arikok

Osyth Henriquez a bisa cu ta su persona a invita e gerencia di Fundacion Parke Nacional Aruba pa bishita Aruba Ocean Villas, cu ta keda na rand di e parke marino na Savaneta. E tabata kier pa nan a bin wak e proyecto di boutique hotel, cu no a bin door di e mangelnan, pero cu ta danki na e trabao di e famia, a logra cu mangelnan a crece. “Si tin un hende cu ta kere den un parke nacional y un parke marino ta ami. Pasobra dia cu a corta piedranan na Colony, ami a cumpra nan. Nan no tabata piedra, sino coral morto. Nos a pone nan den awa y a lo largo coral a cuminza crece riba nan.” Esey ta muestra di su pasion pa naturalesa, el a bisa. Pa tal motibo tambe, Aruba Ocean Villas a acerca expertonan di Aruba, Kirby Barrera y di Boneiro, Kris Kats pa traha e MER. Kats tabata traha antes cu TNO Caribbean y ta e experto cu a yuda traha e plataforma pa e Parke Marino di Aruba. “Ta trata di hendenan serio cu sa kico nan ta haci. No ta hendenan cu ta copia rapport di otro y haci comosifuera ta nan estudio. Nos a laga traha otro rapport, cu ta e rainwater runoff. Prome cu esey, nos a traha un quickscan. Nos MER ta traha di Zeewijk te na Zeerover. Cua prensa ta bay exigi documento di hotelnan existente pa mustra cu tin tur e documentonan aki? Of ta ami so, pasobra mi ta Arubiano?” Henriquez kier sa cuanto di su bisiñanan tin e mesun documentonan y permisonan.

Brug y MER

Locual a pone Henriquez papia habri ayera, no ta e protestanan ni menazanan cu el a haya durante curso di tempo. Sino e hecho cu Gerencia di FPNA, ta usa como argumento na Director di Directie Natuur en Millieu cu Prome Minister a duna instruccion pa e haya e MER den forma digital. Esaki pa Osyth Henriquez ta un forma inacceptabel pa tuma propiedad intelectual cu a costa hopi placa. E ta kere cu Hunta di Directiva di FPNA no por accepta esaki.

Su intencion tabata pa yega na un colaboracion, y entre otro pa mira con por construi un brug riba e raiznan di e mangelnan cu ta keda den e area di e parke marino cu ta responsabilidad di FPNA. “Nos kier a construi un brug di palo, y snoei algun di e mangelnan pa crea un tipo di tunnel pa yega na un cabana. A cambio Aruba Ocean Villas tabata kier a ofrece FPNA pa cumpra 7 mil entrada tur aña pa nos huespednan por bishita e parke,” Henriquez a conta Bon Dia Aruba. “Pero FPNA tabata kier nos MER rapport, pasobra di otro forma nan lo no duna aprobacion. Mi a ofrece nan pa bin lesa e rapport aki mes, pasobra mi no ta bay duna ningun hende e MER pa cua nos a paga asina hopi.” Den su concepto, gerencia di FPNA a manipula pa haya e documento valioso aki, y pa Henriquez e ta nifica cu e mester bay evalua su siguiente pasonan huridico.

FPNA

Bon Dia Aruba a tuma contacto cu Director di FPNA Norman Kuiperi kende a bisa cu e fundacion ta sostene e proyecto di Aruba Ocean Villas, pero netamente pasobra kier haci un construccion di un brug den e parti cu ta toca FPNA, mester wak e MER. “Nos a haya oferta berdad pa bay les’e na e hotel. Pero nos no por pasa nos oficina pa e luga. Ta un raport di 240 pagina cu nos hendenan mester analisa y lo rekeri computer y otro ekipo cu nos no por hiba cu nos. Pa nos por duna opinion riba e intencionnan, nos mester di e MER. Si no, nos no por bisa nada. FPNA no ta contra e proyecto di Aruba Ocean Villas, pero unicamente kier pa tur cos cana corecto,” Kuiperi a bisa Bon Dia Aruba.