Un team internacional di matematico kende nan teorianan a yuda mehora compresion di filenan grandi di data, incluyendo imagen y zonido, lo ricibi reconocemento cu un di e premionan mas prestigioso den mundo di habla Hispano.
E fundacion Spaño cu ta organisa e premionan anual Prinses di Asturias a bisa diamars cu e premio 2020 pa Investigacion lo bay na Yves Meyer, Ingrid Daubechies, Terence Tao y Emmanuel Candes.
E contribucionnan di Meyer y Daubechies den añanan 1980 riba e teoria di ‘wavelets’ tabata clave den desaroya e sistema cu ta compromi imagen den file JPEG 2000, un version hopi mas avansa cu e JPEG original. Entre otro aplicacion practico den mundo digital, nan teoria tambe a permiti imagen saca pa Hubble, e telescop spacial, wordo ricibi na Tera, como tambe e estudio di olanan gravitacional cosmico causa pa black hole den colision.
Ampliando riba investigacion di nan colega cientifico, Tao y Candes despues a desaroya teoria y tecnica cu a ser usa pa screening di salud cu MRI (magnetic resonance imaging scanner).
“E premio aki ta resalta e contribucion social di matematica y su significado como un elemento clave den tur brasa di ciencia”, e hurado a skirbi den un declaracion.
E premionan anual, yama pa heredero di corona, Prinses Leonor, ta entrega den ocho categoria diferente for di arte te deporte. Ganadornan ta ricibi 50mil euro na un ceremonia elegante cu lo tuma luga na october.
