Den un entrevista pa Bon Dia Aruba, Mediador di Gobierno di Aruba, Sr. Anselmo Pontilius, a informa cu el a reuni cu e grupo di sindicatonan, SEPPA, SIMAR, SADA, SPA y FTA pa logra yega na mesa di dialogo cu ambos partido pa mira si por yega na un solucion pa e impasse entre Gobierno y e sindicatonan.
Sr. Pontilius a splica cu el a tuma iniciativa pa invita e dirigentenan sindical despues cu el a tuma nota cu durante fin di aña y e prome simannan di 2022 tabatin un cantidad di intercambio di carta entre e sindicatonan y Gobierno. “Ta evidente cu for di e cartanan por conclui caba cu e diferencia di opinion ta basta grandi, pero no imposibel pa resolve”, el a bisa.
El a indica cu logicamente e punto principal ta keda e recorte di salario di 12.6%, pero banda di esey tin otro puntonan cu e partidonan tin cu mester yega na mesa pa haya otro. “Despues di e cantidad di cartanan cu e partidonan a intercambia a keda comproba cu solamente redactando carta un pa otro bo no ta bay resolve e tipo di situacionnan ki”, Sr. Pontilius a señala.
Pontilius a recorda tambe cu mester tene cuenta cu Hulanda y Aruba tin un acuerdo, cu algun ta di acuerdo cu esey of no, tin un acuerdo cu pais Aruba mester cumpli cune.
Un di e puntonan cu sindicatonan ta para riba dje ta cu nan a bay di acuerdo cu e entrega di 12.6% pa ta solidario cu esunnan cu a perde trabou y esey tabata pa un periodo defini, pero di parti di Hulanda tin e famoso termino ‘tot nader orde’, y esey tin su efecto tambe. Manera ta conoci sindicatonan a informa gobierno cu si ta pa nan entrante 1 di februari nan ta bay traha menos ora pa luna pa motibo cu nan ta haya menos salario
“Eseynan ta puntonan serio pero bo tin cu probecha pa bisa kico ta posibel si of no. Pa e rason ey nos a propone nos a redacta un protocol cu mester ta un documento simpel pero cu puntonan specifico cu ta bisa con nos ta bay back na mesa of con nos ta bay negosha, cua punto nos ta bay negosha, den ki periodo nos ta bay negosha esakinan y con realistico nos por sali for di nan”, Pontilius a agrega.
El a señala cu manera cualkier negociacion dificilmente ta logra un negociacion di cualkier acuerdo intercambiando corespondencia, carta, un pa otro. E ta kere firmemente cu ta na mesa mester tin e debate y ta na mesa partidonan por compronde otro miho pa evita diferencia di opinion, confrontacion y cu e speransa cu por sali for di e impasse cu tin aworaki.
El a remarca cu no por lubida cu pais Aruba, Gobierno di Aruba, a firma un acuerdo cu Hulanda for di 2018 caba. Eyden ta encera, prome cu e pandemia y prome cu e acuerdo grandi aki, cu ta baha costo di e aparato gubernamental, particularmente gastonan di personal. Y el a indica tambe cu tin proposicionnan pa cambia e ley vigente cu ta maneha e derechonan di trahado, e famoso yama “Elema”.
“Si bo ta bay papia di cambio, si bo no kier envolve e sindicato cu e trahadonan e ta bay bira un situacion bastante complica. Ta importante aworaki, riba corto plaso trata di resolve e debate cu tin riba e recorte di salario y wak ki otro alternativanan tin, pero tambe palabra kico nos ta bay haci den e proximo añanan nos dilanti pa loke ta e cambionan”, el a splica.
Pa loke ta trata e comision financiero cu sindicatonan a nenga di forma parti di dje, e ta splica cu den su opinion tin dos parti. Uno ta cu Gobierno a propone un comision financiero y argumenta cu e motibo ta pasobra si e sindicatonan tin duda ariba e cifranan cu nan ta presenta, e ora por laga expertonan di sindicato sinta cu expertonan di gobierno pa conclui si ta berdad cu e cifranan ta corecto.
Di otro banda, el a sigui splica, cu e sindicatonan, uno no ta di acuerdo cu a invita tres representante so si ta nan cinco sindicato y nan ta considera cu e punto e principal ta cu na e momentonan aki tur hende ta realisa cu pais Aruba tin debenan astronomico cu Hulanda entre otro y tin menos entrada debi na e pandemia.
“Pues no tin duda cu e cifranan por ta aki aya. Por ta bo tin algun diferencia di opinion pero den liñanan grandi e cifranan no mester ta un problema. Directie Financien lo bisa nos con exactamente e cosnan ta. Bo no por laga di bisa cu berdad pais Aruba no tin un jaarrekening audica e ultimo añanan pero mi ta kere e cifranan ta basta real”, el a señala.
“E realidad ta cu bo mester purba mira con bo ta sali cu un acuerdo saliendo for di e punto di bista cu uno, nos tin menos entrada y nos tin mas debe y nos tin obligacionnan pa cumpli cu nan, con nos ta bay haci. Atrobe e liña cora cu ta core ta te ki dia bo ta pensa di kita parti di mi salario”, Pontilius a agrega.
E impasse entre sindicatonan tin algun tempo caba andando y e pregunta cu ta sali aworaki ta pakico Mediador no a interveni prome. Sr. Pontilius a a enfatisa cu e no ta kere cu el a tarda. El a remarca cu no mester lubida cu Gobierno tabata na mesa cu e sindicatonan constante y cu nan no tabata yega na un acuerdo ta un otro cos. Pero e dialogo a pega e ultimo simannan na momento cu gobierno a propone e comision financiero.
El a remarca tambe cu Mediador di Gobierno, segun ley ta bisa, su tarea ta dirigi mas tanto pa trahadonan y dunado di trabou den sector priva. El a splica cu e ambtenaarnan y gobierno tin nan propio vehiculonan pa nan atende cu e situacionnan aki. Pero den e caso aki, el a menciona, e tambe ta wordo paga pa gobierno, “dus mi ta bisa cu si por duna aporte ta hacie y door cu mi a mira cu e intercambio di cartanan a bira pisa y no ta sintando, nos a tuma e iniciativa y bisa cu a yega ora awo si pa sinta na mesa”.
Sr. Pontilius a splica cu locual nan a propone ta pa entre otro, si por, pa reuni dialuna caba mas trempan cu ta posibel pa pone un programa realistico con ta bay atende cu e puntonan importante.
Pa loke ta di parti di Gobierno el a indica cu e tabatin combersacion telefonico, WhatsApp, el a manda e-mail y a traha un protocol, un draft, pa e partidonan wak y pa nan purba pone un fundeshi pa cuminsa un combersacion.
“Loke ta hopi importante den cualkier negociacion ta cu e partidonan cu a bay for di otro, sea cu nan ta rabia si of no, cu nan ta topa back cara cu cara y bisa ta kico nan kier y si berdad por haciele asina. Tin momentonan dificil den negociacion pero ta solamente den debate, den dialogo lo bo por sali. E novela di cartanan tin cu caba. Segun mi ya a bisa tur loke por a bisa den cartanan dus ban mesa back awo”, el a finalisa.
