‘Aerial Dance & Performance Aruba’ ta un studio di baile unico na Aruba. Funda pa Maria Alejandra y Kelly Moreno, bailarina profesional cu mas di 10 aña di experiencia, na mei 2018, e studio ta enfoca ariba acrobacia den aire. Daniela Sanchez, instructor y PR na Aerial Dance & Performance, ta conta un poco mas di nan lesnan, e beneficionan di e tipo di ehercicio aki y nan metanan.

Daniela ta conta cu ora cu e studio a wordo funda originalmente nan tabata duna les di aerial silk solamente. Despues nan a sigui crece y evoluciona y aworaki nan tin lesnan di aerial silk, aerial hoop, pole fitness y belly dance.

E ta splica cu aerial silk ta basicamente dos pida tela largo unda por haci caida (drops), diferente posenan y tambe hasta parehanan ta presenta cu nan tambe. Ademas di ta un manera di arte, e ta un ehercicio cu tin diferente beneficionan tambe.

“Beneficionan di aerial silk ta cu nan ta haci bo mas flexibel, nan ta hopi bon pa de-stress aunke e ta un ehercicio basta intenso e ta yuda hopi pa libera stress, e ta fortalece bo musculonan, e ta haci bo mas fuerte y e ta hopi bon. E ta yuda bo enfoca tambe pasobra tin biaha bo mester envolve bo mes cu e tela, bo mester enfoca pa haci algun movemento, dus e ta hopi bon pa esey tambe”, el a splica.

Apart di lesnan aereal silk nan tin aerial hoop tambe cu ta basicamente un circulo di aluminium unda cu e persona por swing riba dje, draai riba dje, haci posenan di flexibilidad y tambe posenan di forsa.

Aunke pa haci e ehercicionan aki den aire ta rekeri algun tipo di forsa, Daniela ta remarca cu bo no mester ta fuerte y flexible pa cuminsa cu e arte aki. “Tin un concepto eroneo di arte aereal cu bo mester ta fuerte y flexibel pa participa, pero esey no ta berdad pasobra nos mes ta duna les di flexibilidad, nos ta duna les di forsa dus nos mes ta yuda cualkier persona cu kier participa bira mas fuerte y mas flexible”, el a indica

Daniela ta splica cu den nan lesnan di pole (tubo) tambe nan ta ofrece tres diferente tipo di pole, tin pole fitness, pole sport y pole dance.

E ta conta cu pole fitness ta pa yuda cu forsa, haci posenan di forsa y nan ta enfoca ariba hand stands (para riba man) y ariba diferente trikinan, mescos cu pole sport. El a sigui splica cu pole sport ta mas pa e hobennan y e tipo aki ta algo mas atletico, un tiki combina cu gimnasia. Nan tin pole dance tambe cu ta un combinacion di coreografia riba vloer y ariba e pole.

“E beneficionan di pole ta casi mesun cos cu esunnan di aerial silk y esun di aerial hoop. Pole ta hopi bon pasobra e ta un ehercicio pa bo curpa completo y e ta tonifica e musculonan hopi bon. Y ami ta kere e ta duna bo un tiki mas confiansa den bo mes pasobra bo semper ta wak bo mes den spiel riba e pole y bo ta traha riba confiansa den bo mes mientras bo ta practicando ariba e pole”, el a agrega.

Daniela ta conta tambe cu cada aña nan tin un show y nan meta ta pa trece un tipo di entretenimento nobo na Aruba cu nan shownan. “E muchanan ta echt gusta tambe pasobra semper tin algo cu nos ta trahando riba dje. Sea ta un show of un examen unda e muchanan mes ta traha nan coreografia y nan ta presenta dilanti e alumnonan y dilanti e docentenan y nos tin shownan di talento tambe. Nos ta haya peticion pa presenta na diferente eventonan tambe.”, el a splica.

E lesnan na Aerial Dance & Performance ta cuminsa di muchanan di cinco aña bay ariba y nan ta dividi e categorianan den grupo di mucha, hoben y adulto.

Por ultimo, Daniela ta remarca cu aunke tin hopi tabu alrededor di “pole dance” y hopi hende ta mir’e como un baile sexual, e ta hopi mas cu esey. “Mi ta haya cu pole dancing den su mesun manera ta arte. Tin un tabu alrededor di pole dancing como algo erotico solamente, cu e por ta pasobra pole dancing ta hopi cos, pero e ta un forma di baile y deporte. Aworaki pole ta birando conoci mas manera un deporte internacionalmente y e ta echt increibel pasobra pa bo ta un atleta di pole dance e ta rekeri hopi disciplina. Y ademas tin diferente categoria di pole tambe” el a finalisa.

LEAVE A REPLY

Please enter your comment!
Please enter your name here