Mediador di Gobierno, Anselmo Pontilius ta riba e mesun linea cu minister di Labor, Glenbert Croes y director di departamento di Labor (DAO), Franklin Kock riba nan preocupacion debi na cierto problema y abuso presenta riba mercado laboral durante e crisis di coronavirus/Covid-19.
Pontilius a reitera cu nos leynan laboral ta keda vigente. Pues un dunado di trabao p.e cu a dicidi su so, sin keda consulta cu su trahado individual o colectivamente, por haci su keho. Si por ehempel e dunado di trabao a haci algo riba salario di e trahado den luna di maart caba, e ta kere cu e trahado ta keda cu su derecho di entrega su keho pa esaki keda registra na departamento di Labor via tel: 523-7720, 594-3185 of 594-3092 durante 8’or di mainta te cu 12’or di merdia entre dialuna pa diabierna. Email: dao.arbeidsgeschillen@gmail.com
Logicamente tin tempo pa bay atende cu e keho aki. Pero e ta kere cu e dunado di trabao cu a haci esey, mester sa cu el a viola un ley. E dunado di trabao pa medio di DAO mester yega na un acuerdo cu e trahado definitivo. Logicamente bo ta spera cu e companianan aki ta keda existi despues di e crisis aki. Ya cu un trahado cu hopi aña di servicio ta un trahado permanente, caminda e dunado di trabao no sin mas por dicidi den un decision laboral di forma unilateral pa kibra condicion di trabao.
Mediador igualmente a splica cu caminda cu tin contract colectivo (CAO), e dunado di trabao hunto cu e sindicato ta yega na palabracionnan por escrito. Esey tambe ta obligacion di e dunado di trabao, caminda unda no tin CAO of sindicato cu ta representa e trahadonan. Pasobra -segun Mediador- tanto e dunado di trabao como e trahado tin un acuerdo mutuo caminda e condicion di trabao ta stipula, tanto orario, salario, condicionnan primario y secundario, etc…
E ta reitera cu cualkier grupo di trahado -no ta importante e tipo di empresa- mester sinti cu nan dunado di trabao, si nan a actua di un forma di panico pa loke ta e luna di maart. Si nan no por a yega na acuerdo, ta su deber pa bay DAO y entrega un keho y cu e keho aki por keda documenta.
E ta consciente cu e crisis actual ta uno dramatico, pero e no ta kere cu niun compania no tabata den posicion di no paga salario completo pa fin di maart. Departamento di Mediador di Gobierno a conoce caso di companianan cu a coregi esaki despues cu e trahadonan a bay reclama. Tambe tin companianan cu a manda e trahadonan cu vakantie paga, y esey ta posibel. Unabes cu e vakantie caba e companianan a yega di notifica nan trahadonan pa yega na un acuerdo pa wak con nan lo sigui durante e proximo lunanan.
Logicamente cada dunado di trabao lo tin cu bay evalua luna pa luna con e situacion di su empresa ta. Den e situacion actual tin un cantidad di compania cu no sa mes, si nan ta bay keda existi mirando nan situacion, segun Pontilius. Cada compania ta distinto y cada un di nan tin nan realidad financiero, y nan compromisonan.
