E mediconan specialista di Hospital dr. Horacio E. Oduber ta desea di expresa nan preocupacion pa e desaroyonan actual di e pandemia di COVID-19 na Aruba. E cantidad di contagio desde e di dos ola na inicio di augustus no ta baha. E cantidad di persona interna den hospital ta sigui aumenta constantemente. E cantidad di pashent den estado grave y di fayecido tambe ta aumenta.

E presion riba capacidad di hospital y di personal tambe ta sigui aumenta. Den ultimo simannan a tuma diferente medida di escalamiento den hospital pa por sigura e cuido tanto pa pashent di COVID-19 como pa e pashentnan cu no tin COVID-19.

Asina a limita e cuido electivo te na cuido esencial y urgente, esaki ta encera concretamente cu operacion y examen cu no ta urgente y cu medicamente por warda ainda, actualmente ta ser posponi. Den hospital a desocupa cierto departamentonan pa duna espacio na cuido di pashent di COVID-19, esaki ta bay a costo di nos otro cuido. Enfermero, medico y personal di apoyo ta ser asigna na cuido fuera di e shiftnan regular.

Den ultimo lunanan diferente experto a traha intensivamente pa mehora y aumenta protocol, guidelines, material y recurso humano pa por regula e cuido di pashent di COVID-19 mas tanto posibel. E meta ta pa laga e cuido regular continua mas largo cu ta posibel. A traha intensivamente cu otro dunadonan di cuido na Aruba, manera asociacion di dokter di cas, pa hunto por enfrenta e epidemia lo miho posibel.

Cu cada escalamiento di e asina yama cuido di COVID-19 esaki lo bay a costo di pashent cu mester di cuido pa otro motibo. Capacidad maximo di cama, regular, pa pashent di COVID-19 y pa pashent di IC ta depende di factor manera entre otro personal disponibel, medicacion y material. Manera cu riba henter e isla habitante ta keda contagia cu Covid-19, asina tambe e ta toca personal na hospital. Esaki tin consecuencia directo pa nos disponibilidad di personal.

E capacidad maximo aki di cuido ta dinamico y nos tin miedo cu, a pesar di e medidanan di precaucion, si e cantidad di contagio no ta baha y a consecuencia di esey e cantidad di hende gravemente malo di Covid-19 keda aumenta, dentro di poco hospital no por duna cuido sigur na tur pashent. Hospital dr. Horacio E. Oduber ta e unico hospital na e isla cu ta duna cuido na pashent di COVID-19, e unico cu un departamento di intensive care. E situacion aki por lo tanto ta toca tur hende.

Na modo di papia anto ta 5 pa 12 y nos ta desea di haci un yamado urgente na e poblacion pa tuma e situacion aki hopi na serio. Nos ta desea di haci un yamado na e poblacion pa sigui e medidanan imponi caba manera higiena di man, mantene distancia y tapa boca, y pa cumpli cu e medidanan di isolacion y cuarentena. Tambe nos ta desea di pidi e poblacion pa den e tempo nos dilanti no bay bishita famia y amigo, no bay fiesta o reunion, pero simplemente keda cas mas tanto posibel! Por combati e epidemia aki solamente si tur hende coopera y haci di su parti loke mester.

Ook willen wij de bevolking verzoeken om de komende tijd níet op bezoek te gaan bij familie en vrienden, níet naar feesten of bijeenkomsten te gaan, maar gewoon zo veel mogelijk thuis te blijven! Deze epidemie is alleen te bestrijden als iedereen meewerkt en zich hiervoor inzet.