Banco Central di Aruba a publica recientemente cifranan di entrada di gobierno te cu augustus 2021, a base di cual Bon Dia Aruba a recoge e cifranan di ocho luna di aña, y mescos cu luna pasa, a haci un comparacion cu e añanan anterior, 2019 y 2020, te na e mesun fecha ey (fin di augustus).

E tendencianan señala luna pasa (articulo 06 september 2021) a sigui mesun rumbo, marcando un mehoracion di entrada di diferente tipo di impuesto (invoerrechten, accijns, BBO/BAVP), cu ta mustra riba un mehoracion di e clima economico. Tur indicador presenta den e resumen aki, cu excepcion di loonbelasting, a mustra avance, tanto den comparacion cu 2020 como cu 2019.

Loonbelasting no ta mustra un mehoracion mes fuerte, pero cu si tabata anticipa. Mientras na 2020 a logra recoge Afl. 219,4 miyon na loonbelasting, e aña aki a calcula un suma total di Afl. 195,7 miyon pa Presupuesto 2021. Te cu augustus a haya 64,5% di loke ta anticipa pa 2021, cu perspectiva pa yega na e suma calcula. Di tur manera aña 2020, cu un grupo hopi grandi di empresa bao di areglo di subsidio di salario, lo keda cu alrededor di Afl. 24 miyon mas cu e aña aki, señal cu empleo no ta na su nivel di 2019 ainda. Mas di esaki bao di e titulo Empleo.

Entrada Total

En total entrada gubernamental a aumenta, compara cu luna di augustus 2020 y 2019. Na juli entrada total 2021 tabata na 104,5% di 2020 y a subi te na 106,3%, y a mustra un aumento leve compara cu 2019 y ta awor na 78,7% di 2019. Entrada di impuesto tambe a mehora, compara tanto cu 2019 como 2020. Actualmente entrada total di impuesto 2021 a surpasa nivel di 2020 y ta na 101,1% di aña pasa.

Layout please pone tabel 1 aki

Impuesto

Den Tabel 2 aki bao ta presenta e cifranan actualiza pa diferente tipo di impuesto, te cu augustus 2021, compara cu e mesun periodo di 2019 y 2020. Por observa cu loonbelasting despues di 8 luna ainda ta bao di 70% di loke e tabata na 2019, y na 78% di loke a registra aña pasa. Di otro banda, tanto impuesto di importacion como accijns y BBO/BAVP ta mustra mehoracion compara tanto cu 2019 como 2020. Pa tur tres e categorianan aki a registra un nivel cu ta mas di 100% di loke a recoge na 2020, mientras cu compara cu 2019 ta mustra un mehoracion relativamente chikito. BBO/BAVP ta na un nivel di alrededor di 90% di loke e tabata na 2019, pero compara cu 2020 ta mustra di ta na 118% di 2020, un señal cla cu economia ta moviendo.

Layout please Tabel 2 aki

Empleo

For di e cifranan menos alentador di loonbelasting, aunke den Presupuesto 2021 a tene cuenta cu esaki, cu lo ta mas abao cu na 2020, por conclui cu empleo no a bolbe (ainda) na e nivel unda e tabata. Te cu luna di augustus loonbelasting tabata na 78% di loke a cobra te cu augustus 2020, y segun proyeccion di presupuesto lo ta alrededor di Afl. 195,7 miyon, 10,8% menos cu e aña anterior. Mientras tanto ambos aña ta mustra ainda un diferencia considerable cu 2019, tempo cu impuesto riba salario tabata na Afl. 267,1 miyon, como 26,7% mas cu loke ta spera haya e aña aki.

Cifranan di SVb ta confirma cu empleo oficialmente registra ainda ta mustra dia 1 di october 2021 un diferencia ainda di alrededor di 1.500 cupo di trabao menos cu januari 2020, pero por nota si un aumento di empleo entre januari 2021 y inicio di actual luna di october. Den e periodo di 9 luna aki a registra un aumento di 1.927 relacion di trabao, cu por ta fulltime o parttime. Entre januari 2020 y januari 2021 a registra un caida di relacion di trabao cu 3491 cupo, di cual awor ya mas di 50% a keda compensa pa empleo nobo o reanuda. Den e mesun periodo aki di januari pa october 2021 a registra tambe 181 dunador di trabao nobo.

Pregunta cu ta keda ta e cantidad di empleo informal cu logicamente no ta registra na SVb y por lo tanto no ta paga ni loonbelasting ni prima social o medico. Di e problema aki naturalmente no ta conoci ningun cifra. Di un banda ta observa un aumento di actividad economico, cu consecuencia positivo pa impuesto y e fondonan social, pero ta observa un atraso den recuperacion den pago di impuesto riba salario. Si e tendencia aki tin di haci cu aumento di trabao informal anto lo mester aumenta control riba actividad economico, pa gobierno no ta perdiendo innecesariamente ingreso, mientras e situacion financiero ta sigui dificil.

LEAVE A REPLY

Please enter your comment!
Please enter your name here