Gabinete Wever Croes a mal uza confiansa di pueblo pa yega na poder, a mal informa pueblo pa logra esaki y ora cu a forma gobierno, pueblo a wordo castiga den un forma cu nunca a spera.
Miembro di partido AVP, Melvin Tromp a mustra cu pa aña nobo, pueblo tin cu prepara su mes pa otro serie di medida, caminda e siguiente etapa di reforma fiscal lo drenta na vigor y cu ora esaki tuma luga, pueblo lo mira su poder di compra sigui disminui.
“Aruba pa dos aña caba a conoce un gobierno cu no tin interes di pueblo na pecho, cu no ta trahando pa pone e hende central, al contrario e unico caminda cu e hende ta central pa gabinete Wever Croes, ta den e pakete di medida cu ta sigui wordo introduci.
Prome Minister Evelyn Wever Croes a declara recientemente cu pa su gobierno ta miho Citgo bay mas pronto posibel for di Aruba, e mesun lider di MEP cu a elogia su primo Glenbert Croes cu el a logra reapertura di e refineria.
E mesun lider di MEP cu a para na porta di e refineria y hasta yama un plasa eynan na plasa Cero, ya cu si tin un solo porciento pa habri e refineria, esaki tin cu tuma luga pero desde cu el a bira Prome Minister, Evelyn no a presenta ningun solucion pa e proceso aki, no a presente ningun compania di tanto cu el a papia cu nan cu lo ta interesa y awor kier pa e refineria bay.
Aki pueblo por mira un biaha mas con e tin un Prome Minister cu ta traha pa famia y amigo, pa sponsornan ya cu tin hopi interes priva ta hunga un rol den e henter e desaroyo rond di e refineria y e ta dunando indicacion cu e kier sirbi e interes di e hendenan aki y no interes di pueblo.
Ta masha fanfaria Prome Minister a anuncia decisionnan riba e cobransa di loonelasting y otro tipo di incentivonan cu su gobierno a introduci na interes di esunnan di menos entrada pero aki ta otro maniobra mas pa manipula opinion di pueblo cu despues ta wordo castiga.
E decisionnan aki no ta na nivel di e medidanan cu su gobierno a introduci y lo sigui introduci den simannan nos dilanti, ya cu mientras cu e ta duna 10 florin cu su decision tuma, di otro banda e lo ranca entre 50 pa 100 florin for di mesun ciudadano aki cu mas medidanan cu ta na caminda.
Den tur bario, den tur sector di comunidad por mira e efecto negativo di un maneho abusivo y sin piedad di gabinete Wever Croes, cu no tin compasion cu pueblo, e mesun pueblo cu el a priminti di lo sirbi.
Nunca pueblo a conoce e gasolin mas barata priminti pa actual Minister Glenbert Croes, tampoco reduccion di prijs di awa y coriente ya cu loke a tuma luga recientemente, ta cu gobierno a duna pueblo dos florin bek, despues di a ranca 20 florin for di su cartera.
Pa pueblo no tin nada positivo, no tin ningun proyecto na caminda, gobierno no tin inversion pa haci y for di sector comercial ya caba tin indicacion cu no tin mucho interes pa inverti den proyectonan bou mando di e gobierno actual.
Mientras cu continuamente gabinete Wever Croes ta papia di debe nacional, un minister kier a bin cu un proyecto cu lo costa pueblo casi 500 miyon florin pa Serlimar, loke tambe lo aporta na e debe nacional, pero diripiente esaki ya no ta problema.
Tin desaroyonan sumamente preocupante y tur cos ta indica cu memey di e luna di Januari aki, Gabinete di Ministernan di Reino lo duna gabinete Wever Croes un ‘aanwijzing’ ya cu simplemente Evelyn y Xiomara no por tene nan mes na palabracionnan haci cu tanto CFT gobierno di Reino,” Melvin Tromp di AVP a declara.
