Diaranson den Parlamento, 5 ley a wordo trata. Entre nan, e Ley cu ta regla pago pa e ex trahadonan di Setar. Pa mas di 10 aña, e trahadonan a cana un caminda largo di lucha hunto cu Abogado pa nan logra haya e placa cu no a wordo paga na nan desde cu e compania di telefon a bay over pa bira un NV. Varios biaha e trahadonan a protesta.
Hasta cu cruznan a bay manifesta contra Gobierno di Mike Eman dilanti di Bestuurskantoor y Parlamento pa asina por a haya atencion di Gobierno. Maart aña pasa, despues di a bay corte varios biaha y entama caso contra di gobierno, e ex trahadonan a gana nan caso. Hues a dicta cu gobierno mester paga nan e suma di 2.5 miyon como tambe gobierno mester paga gasto di abogado. Awor porfin Gobierno a dicidi di bin cu e ley pa paga e ex trahadonan e suma di placa cu gobierno debenan. Y MEP ta sostene e ley aki.
“MEP ta para tras di e ley aki. Nos ta sostene e ley aki. Y ta haci un apelacion na e minister pa no tarda di duna e suma aki pa paga e trahadonan. Varios no tin pensioen of entrada. Y a tarda hopi pa regla esaki y e trahadonan tambe ta wardando riba dje pa hopi tempo” Lider di MEP Sra. Evelyn Wever-Croes a duna di conoce.
