Mester defini rumbo di nos economia

ORANJESTAD – Diferente reaccion a wordo expresa, ya sea cu un tint politico of no, den contra of na fabor, di un proyecto hotelero di 900 camber, mayoria di nan all inclusive, den e area di Sero Colorado y Baby Beach.

Parlamentario Edgard Vrolijk (MEP) ainda ta ambivalente riba nan posicion riba e proyecto aki. E no por bay den detaye si e ta na fabor of contra, pero si e ta habri pa desaroyo pa San Nicolas. Pasobra nan tambe ta merece.

A pesar cu e ta na fabor di cierto desaroyo na San Nicolas, Vrolijk ta kere cu ta yegando momento pa trek un linea unda nos kier bay completamente cu nos economia. Si nos ta bay depende di turismo so, nan tin cu laga pueblo sa cu riba e direccion ey nos pais ta bay. Ya cu tin biaha ta wordo papia di diversificacion of no di nos economia.

Impacto y desempleo
E ta haya cu un punto cu por bira un punto di discusion ta e cantidad di camber, ya cu ora ta wordo papia di un proyecto grandi, mester haci e calculacion debido di cuanto hende mester y kico no tin na Aruba. Tambe e ta considera cu nos mester ta critico cu nos mes, pa e impacto cu un proyecto di e embergadura aki por tin pa enseñansa y nos mecanismo di labor, cu mester hunga un rol importante. Tin un nivel di desempleo riba nos isla, y mester percura pa nos hendenan haya trabou. Ya cu ta wordo papia di un cifra di 5 mil hende desemplea, mester percura pa e grupo ey wordo educa cu por bay den e proyecto aki tambe.

Na momento cu e parlamentario di e fraccionnan cu ta sostene e gobierno di coalicion a duna su opinion riba e asunto aki, ainda e minister di infrastructura, Otmar Oduber no a papia riba e proyecto aki ampliamente, manera el a yega di haci durante un conferencia di prensa organisa pa gobierno dialuna ultimo, banda di 10or di mainta. Mas tanto e versionnan cu e tabatin a bin di prensa, a base di reaccionnan cu organisacionnan medio ambiental a yega di expresa contra e proyecto aki.

P’esey e tabata reserva den su declaracion te ora cu e version di gobierno –den e caso aki di e mandatario cu ta atende cu e proyecto aki–ta sali afo. Sinembargo, Vrolijk ta haya cu nos mester ta realistico, cu pa hopi biaha nos por tende di hotelnan cu a wordo pidi pa establece na San Nicolas. Tambe e ta haya cu pueblo a pidi pa desaroyo turistico y hotel na San Nicolas. Pero tin e banda cu tin moratorio y otro discusion mas andando.

Pero e ta kere cu nos mester para keto un rato cu a purba di diferente manera, entre nan cu refineria, pa trece progreso economico na San Nicolas. Pero te ainda e refineria no a start, y nos tin hopi aña practicamente bibando sin refineria. E ta haya cu mester explora ora manera pa genera entrada. Ademas, e ta kere cu pueblo di San Nicolas mester inversion tambe.

Pues e ta haya cu ainda tin caminda pa cana relaciona cu e proyecto hotelero cu eventualmente lo bin pariba di brug, pero e ta prefera cu tur declaracion rond di e proyecto aki ta wordo divulga oficialmente, pa asina nan –como fraccion di MEP– por expresa nan puntonan. Segun Vrolijk, cada proyecto cu bin ta mustra un posibilidad grandi, pero nos mester por sunstanci’e y haci’e mas miho posibel colectivamente.

 

You May Also Like

Dama ta wordo yama pa ladron despues di kier a yuda un cacho

Un dama studiante cu ta di bishita aki na Aruba inocentemente a bay pa ...

Compania MetaCorp ta hiba gobierno corte pa tardansa riba otorgamento di tereno

Awe mainta corte a suspende tratamento di caso MetaCorp Chain Theatres contra gobierno te ...

Screen Shot 2016-10-20 at 1.23.47 PM copy.jpg

Homber a menasa di tira baby debi cu e mama no a lage bay cune

Diahuebs mainta na e casnan di pueblo na Mabon Caya Tapushi, polis a keda ...

13907002_10154448550149140_8935078726298457058_n.jpg

Caso ABC posponi: Mester di un hues cu no ta riba Facebook

Diamars mainta Aruba BirdlifeConsevation tabata den corte pa trata e caso contra desaroyadonan di proyecto ...

candela Jaburibari

Candela di mondi grandi tabata intencional

E candela grandi diasabra atardi den mondi cerca Parke Curason na Jaburibari tabata intencional. ...