Presidente Mexicano, Andrés Manuel López Obrador ayera dialuna den un conferencia di prensa a splica cu Mexico lo comunica di biaha cu e prome pais cu demostra di tin un vacuna eficaz contra Covid-19 sea China, Merca of Rusia. El a bisa cu “den e asunto importante aki no mester tin ideologia”. Ademas a sigura cu e lo ta e prome persona pa aplica pa esey y asina no lo tin duda.

“E asunto aki ta asina importante cu no mester tin ideologia, tin ideanan, pero salud ta prome, si na Rusia of China haya e vacuna prome y demostra cu ta eficaz, di biaha nos lo establece comunicacion.

Personalmente mi lo papia cu e presidente di China, cu presidente Putin, pa nos haya e vacuna y mesun cos cu presidente Trump. E prome cu hay’e, y Mexico tin e prestigio special y respaldo.”

Pa loke ta trata e vacuna Ruso, el a bisa cu si comproba cu ta eficaz, e lo ta e prome persona cu lo aplica pa esey.

Tambe a splica cu Mexico tin un fondo special pa e compra di e vacuna, y lo aplica di manera universal y gratis.

Diadomingo ultimo e mandatario Mexicano a sigura cu vacuna contra Covid-19, produci na su pais, Argentina y cu apoyo di iniciativa priva, lo por cuminsa aplica den e prome tres luna di aña 2021.

Diaranson di siman pasa e gobiernonan Mexicano y Argentino, cu lider Lopez Obrador y Fernandez, respectivamente, a anuncia cu nan a acorda di produci den conhunto te 250 miyon dosis di e vacuna contra Covid-19 desaroya pa Universidad di Oxford.

LEAVE A REPLY

Please enter your comment!
Please enter your name here