Centenares di migrante Hondureño a atravesa e poblacion fronteriso cu Guatemala di Agua Caliente, cu e obhetivo di sigui te yega na Merca. E situacion di e personanan aki ta di pobresa extremo, y ademas, hopi di nan tin cu lucha cu e violencia na nan pais, enfoca riba accionnan di gangnan.

E grupo di persona aki a aali for di ciudad di San Pedro Sula den busnan na e frontera, cantando canticanan contra e presidente Juan Orlando Hernandez y cu bandera di nan pais. Ta trata di e prome caravana di aña 2020.

Ley ta permiti pa migrantenan Centro Americano transita pa e diferente paisnan di e region, cu nan documento di identidad so. Sin paspoort ni visa. Pero na e frontera Mexicano e condicion di bida cada biaha ta mas estricto y e pais goberna pa Andrés Manuel López Obrador desde mita di 2019 a bira un especie di ‘tapa’ pa migrantenan Centro Americano cu ta soña cu yega na e Union Americano.

Pia abou of cu auto, e migrantenan a cuminsa drenta Guatemala, un dia despues cu e presidente nobo, Alejandro Giammattei a tuma e poder y ken a compromete pa facilita e paso pa adultonan Hondureño cu ta cumpli cu e rekisito di tin identificacion, pero el a mustra mas exigente den e ora di laga muchanan menor di edad crusa. Nan mester di paspoort y un autorisacion firma pa nan mayornan.

Gimmattei a adverti e caravana aki, prome cu nan sali desde nan ciudadnan, cu ‘tabata destina pa fracaso’. E dirigente nobo a mantene dia 15 di januari ultimo un reunion cu e canciyer di Mexico, Marcelo Ebrard y e postura di Mexico tabata claro. Un rotundo ‘no’ pa permiti e caravana drenta paden di su fronteranan.

LEAVE A REPLY

Please enter your comment!
Please enter your name here