Diasabra anochi, Rotary Club of Aruba a presenta nan directiva 2019-2020. Durante un anochi ameno den Alhambra Ballroom, e publico presente a cera conoci cu e miembronan di e directiva nobo. E anochi aki tabata sumamente special, ya cu ta pa prome biaha ta instala un presidente femenino.
América Barrios ta forma parti di Rotary Club of Aruba desde 2011. América a keda apunta come e presidente 2019-2020 y e miembronan di e directiva a keda como lo siguiente: Emilie Arends (secretaria), Walter Mosher (tesorero), Edsel Lopez (presidente saliente), Geert Rep (vice presidente), Rubiela Lampe-Chiquito (relacionista publico), Milton van Brussel (miembrecia), Orlando Hoevertsz (proyectonan), Diego Acevedo (Fundacion Rotary International) y Liesbeth Keppel (sergeant at arms).
Durante su presentacion América a enfoca riba e importancia pa ta un miembro di Rotary y e impacto cu Rotary tin riba nos comunidad, pero tambe riba e miembro nan mes. Manera ta conoci Rotary Club of Aruba ta yuda diferente fundacion na Aruba. Door di keda organisa evento nan pa recauda fondo, Rotary ta keda haci impacto riba esunnan cu mas mester di dje. E aña aki e enfoke lo keda riba yuda diferente fundacion pa asina crece den impacto y conectando tur partners importante den comunidad. Alabes tuma accion pa sigui bin cu ideanan pa haci un cambio pa miho den nos comunidad. Cu esaki América y su directiva nobo ta uni nan mes na e strategia y tema di Rotary International: “Rotary Connects the World”.
América ta gradici Edsel y directiva saliente pa e bon trabao. Ademas América kier a duna un danki na e comision cu a organisa e anochi bunita aki y sin laga afo e personal di Divi Resorts y Alhambra Ballroom.
