Luisa Ortega Díaz
Luisa Ortega Díaz

Luisa Ortega Díaz, Fiscal general di Venezuela no ta keda sin denuncia tur violacion di banda di e regimen militar di presidente di Venezuela, a pesar cu el  a wordo  saca di su posicion di Fiscal General.

El a denuncia e persecucion di banda di dictadura di Maduro den su contra. Den un entrevista el a admiti cu cada nochi e ta cambia di cas,  pasobra e tin miedo di perde su bida. “Mi kier denuncia dilanti di comunidad internacional, cu mi ta bao di un persecucion permanente, na mi cas, na tur lugar caminda mi ta move,” el a declara.

“Mi no sa cual  ta e obhetivo y e plan cu nan tin contra mi, nan por detene mi, pero tambe nan por kita mi bida,” Ortega a agrega. Igualmente e Fiscal a detaya cu e tin un auto identifica caba,  cu ta sigui Ortega henter dia y cu ta tuma potret di dje semper, ora cu e ta yega algun lugar.

Ortega Díaz a bisa cu: “Mi tin un menasa na mi cas, mi famia, caminda cu mi ta move… nan a menasa mi cu kita mi libertad, pero tambe di kita mi bida.” El a bisa cu e lo sigui lucha pa libertad di Venezuela, y el a laga bon cla cu e no ta sinti arepentimento di nada cu el a haci, tempo cu e tabata fungi como fiscal.

“Mi no tin miedo, mi ta cla pa defende tur derecho di Venezolanonan,” Ortega a bisa. Exponentenan di Chavismo a adverti Ortega cu e lo por termina den prizon. “Prome cu su destitucion, Ortega a comunica dilanti di organisacion di estado Mericano OEA, tur menasa di banda di Chavismo, en vista di e menasa cu e ta hayando.

Dia 5 di augustus e proyecto di constituyente cu  a ser presenta pa Maduro, a confirma e destitucion di Luisa Ortega di su posicion di fiscal. Ortega lo ser enhuicia dilanti di Tribunal supremo di husticia (TSJ). A pesar di tur menasa, Ortega a sigui cu su denuncia contra dictadura di Maduro. Diamars el a publica riba su cuenta di Twitter un comunicado, caminda e ta papia pa “henter comunidad di Venezuela y comunidad internacional.” Ortega a bisa den e comunicado cu e pais ta dilanti di un gobierno ‘de facto’ y el a denuncia cu varios organismo di gobierno di Maduro a participa den violacion sistematico di derecho humano, den mas di 4 luna di protesta na Venezuela.

Ortega a bisa cu e no ta acepta su destitucion y el a sigura cu Asamblea Constituyente ta “ilegitimo”.