Despues cu Bon Dia Aruba a publica e noticia cu minister di Integracion, Energia y Labor, Glenbert Croes a duna retiro na director di DIMAS, Kathy Paskel, pa motibo di desconfiansa segun el a sigura, parlamentario di partido MAS, Aquannette Gunn ayera a manda un serie di pregunta na minister Croes relaciona cu e caso aki.

Den su solicitud, den cual ta señala cu conforme articulo IIII.7 di Areglo di Estado, hunto cu articulo 59 di reglamento di Ordo di Parlamento di Aruba, Gunn a señala cu durante un reunion den parlamento minister Croes a informa e parlamentarionan cu el a institui un “Stuurgroep” pa un termino di seis luna, na unda a sigura cu tambe e director, esta Kathy Paskel, tabata forma parti.

Segun splicacion di minister Croes, e meta di e stuurgroep aki ta pa guia y informa trahadonan di DIMAS pa loke ta trata maneho nobo di e minister aki.

Den relacion cu e declaracion di minister Croes, Gunn como parlamentario y basa riba ‘good corporate governance’ a manda un serie di pregunta na Croes pa asina e por duna mas splicacion na parlamento tocante riba e situacion aki.

E prome pregunta ta indica si minister Croes por informa parlamento den detaye e motibonan pakico minister a tuma e decision di cambia e meta di stuurgroep y nombra un “Management Team”, manera a Bon Dia Aruba a publica den su edicion di ayera diabierna.

Den e resto di preguntanan Gunn a puntra: Minister por informa Parlamento kico ta e motibo(nan) di desconfiansa cu a conduci cu Minister a tuma e decision di kita e autoridad di e Directora di DIMAS?

Considerando cu e directora di DIMAS a keda informa ayera por escrito riba su Excelencia su decision y cu a nombra un Management Team pa maneha DIMAS, cual di dicho y paso a drenta na vigor ayera mes, minister por informa parlamento pakico a tuma un decision asina abrupto y severo?

Minister por informa parlamento si su decision tuma ta den corelacion cu ‘Good Corporate Governance’?

Minister por informa parlamento si tin sospecho di violacion di integridad cu simultaneamente lo por desaroya den sospecho di actonan castigabel?

Minister por informa parlamento si actualmente tin un investigacion contra Directora di DIMAS? Si e contesta ta afirmativo, minister por comparti cu parlamento cua instancia ta efectuando dicho investigacion?

Minister por informa parlamento si e director tin prohibicion pa drenta DIMAS? Si e contesta ta afirmativo minister por informa parlamento pa cuanto tempo?

Minister por informa parlamento si ta e caso cu tin investigacion andando bao mas trahado di DIMAS?

Minister por informa parlamento si e nombramento di e miembronan di e Management Team a keda haci segun un ‘profielschets’? Si e contesta ta afirmativo minister por comparti e profielschets cu parlamento?

Minister por informa parlamento di cuanto persona e Management Team ta consisti?

Minister por comparti cu parlamento e nombernan di e miembronan y nan respectivo funcion?

Minister por informa parlamento ken(nan) tin autorisacion pa firma (‘tekenbevoegdheid’) e peticionnan?

Minister por informa parlamento si e Management Team lo maneha DIMAS pa un periodo temporal of durante e periodo di gobernacion di su Excelencia?

Pa finalisa, el a menciona cu el a pidi na presidente di parlamento Edgard Vrolijk pa dirigi e preguntanan aki na minister Croes y cu e ta desea di haya contesta por escrito y den un tempo cortico riba su preguntanan. Ta importante pa menciona cu comunidad tambe tin e mesun preguntanan aki.

Di otro banda, minister Croes a manda un comunicado di prensa pa informa cu a tene un reunion cu director y director suplente di DIMAS na october 2021, a informa nan tocante maneho nobo di admision y integracion, y cu tambe lo bin un management team di e cual nan dos lo forma parti, ademas di procesonan cu lo mester atende cu urgencia manera proceso di peticion di permiso, ademas di mandatering y e audit di e Sistema di ICT pa motibo cu esaki ta un problema grandi den DIMAS, y tambe reactivacion di Adviescommissie Toelating en Uitzetting (ATU).

E comunicado ta continua bisando “despues di esaki e director a ricibi un carta caminda e contenido di e reunion a wordo ratifica. Den e dos simannan cu a sigui Director a pidi minister audiencia bilateral y a indica di tin problema cu e institucion di un management team, como tambe cu e nomber di ‘management team’, pasobra e ta afecta su posicion como director. El a sugeri pa cambia e nomber y minister pa acomod’e a dicidi di cambia e nomber pa stuurgroep. Den un carta di 1 november 2021 director a haya notificacion di e institucion di un stuurgroep (y e MB relaciona cu esaki)”.

“Durante prome reunionnan den stuurgroep a tuma e decision di bin cu subcommissie di e miembronan di stuurgroep mes, pa inicia y begeleid e ICT audit scan y pa formalisa esaki. A pesar cu e tabata parti di e reunionnan, y e ta na altura di e decisionnan tuma, director cuminsa di su banda frustra e proceso. Un di e prome incidentenan, ora cu e minister a drenta den e funcion ta, cu e IT-er di DIMAS mester a wordo suspendi (geschorst) door cu lo tabatin un aangifte haci contra di e IT cu a conduci na un investigacion penal (strafrechtelijk onderzoek). Pues a cuminsa cu un DIMAS debilita door di e incidente aki, mientras cu e funcion aki ta uno hopi importante, delicado y vulnerabel”.

“Den e formalisacion di e ICT audit scan a dicidi (leg vast) e ora, cu durante cu e audit scan ta tumando luga, tur proceso di reclutamento y seleccion (werving y selectie) pa cu e funcion di IT lo para te ora cu e audit termina. E decision aki tambe e director no a respeta ni honra e decision di Minister y a continua cu rondanan di solicitud y a keda dirigi e ICT unilateralmente. Ademas a keda haci su maximo esfuerso pa trece e IT-er suspendi back DIMAS. Mientras tanto e IT’er a haya su retiro”.

“Ora minister a haya sa cu DIMAS a duna Guarda Nos Costa 3 tablet pa por a drenta den sistema di SIRSA pa haya informacion di un solicitante pa permiso, y cu e acceso di GNC na e sistema tabata completamente habri y ilimita (cu nan tabata haya acceso na TUR informacion di tanto e aplicante, su dunado di trabao y henter e proceso cu e ta encaminando na DIMAS), minister a duna instruccion pa pidi e tabletnan back y pa limita e acceso di GNC na e sistema. Esaki a causa consternacion cerca GNC y entre otro e director di DIMAS. A pesar cu minister a impone un prohibicion temporario di e comunicacion directo entre GNC y DIMAS, e director na diferente ocasion a (permiti pa) ignora e decision aki di minister. Despues, ora a yega na un solucion, y e prohibicion temporario a wordo elimina inmediatamente, a wordo constata cu GNC no a haya acceso na e sistema conforme instruccion di e restriccionnan imponi pa minister, pero mas bien a keda cu e acceso di por wak entre otro adres di e persona y resultado di e peticion (positivo of negativo). Pues a pesar cu minister tabata contundente y duidelijk den esaki, no a actua di acuerdo cu y conforme e mandatario su instruccionnan”.

Pa finalisa, e comunicado ta informa cu “despues minister a tuma nota cu el a copia algun MB’s cu minister a manda p’e, como tambe stuurgroep, pa formalisacion di algun decision, cual el a dicidi unilateralmente di difundi y copia OM caminda e ta acusa minister di ta comete valsheid in geschrifte. Esaki pa minister tabata e motibo di kita autoridad di Paskel ya cu e acusacion aki ta completamente falso. Minister tabata haciendo su maximo esfuerso pa laga e director participa activamente den e proceso di mehoracion den DIMAS como tambe e implementacion di su maneho di admision y integracion. Tumando na cuenta e acusacionnan falso haci door di e director, a constata y comproba cu e relacion di trabao a bira insostenibel (onhoudbaar), cu a viola e confiansa di magnitud ireparabel. Minister a tuma e decision di kita tur autoridad di e director y institui un management team cu e dirigencia y maneho di DIMAS”.