Durante encuentro na Cas di Partido di AVP, e lider actual Mike Eman a presenta e siguiente paso den loke e ta yama “Era di Relevo”, unda lo traspasa liderazgo di e partido despues di 25 aña cu cargando e funcion di lider di e partido.
Durante un encuentro na Cas di Partido, lider di Partido AVP Mike Eman a anuncia cu durante Congreso di partido cu lo tuma luga dia 4 di october 2026, e ta prepara pa transferi liderazgo na Wendrick Cicilia, marcando e siguiente paso concreto den e proceso cu AVP a denomina “Era di Relevo.”
E anuncio a tuma luga mientras Eman tabata reflexiona tocante su propio trayectoria, a papia tocante e importancia di renobacion y e necesidad di e partido di sigui conecta cu tanto realidad como necesidadnan di comunidad, tur esaki den presencia di diferente dirigente y candidato di e partido.
E agenda anuncia pa e congreso lo inclui, entre otro, e transicion oficial di liderazgo, cambionan den statuto y presentacion di un directiva nobo pa partido AVP. Eman a indica cu durante diferente etapa, AVP a busca scucha e señalnan cu comunidad ta duna y responde na e necesidadnan di su tempo. Segun e lider saliente, e persona cu ta carga responsabilidad politico mester por representa y comprende e generacion cu e ta sirbi.
Despues di 25 aña como lider di AVP, Eman a expresa cu e momento a yega pa otro generacion asumi e responsabilidad di liderazgo.
Un punto central den e encuentro tabata e anuncio di Eman tocante Cicilia, mencionando cu el a mira un compromiso cu comunidad y disposicion pa asumi e responsabilidad den Cicilia. Segun Cicilia, “liderazgo ta rekeri pasion, responsabilidad y amor pa bo hendenan. P’esey mi ta spera mira nos miembronan, simpatisantenan y tur esnan cu kier forma parti di e combersacion dia 4 di october. Laga nos tuma e siguiente paso aki hunto.”
Den su mensahe, Eman a presenta e cambio como un transferencia di responsabilidad entre generacionnan, mientras e ta indica cu su propio participacion den comunidad lo continua den otra capacidad, dedicando un parti importante di su mensahe na loke e kier haci despues di su etapa como lider politico activo.
