Diamars ultimo a cuminsa e Aña Parlamentario 2021-2022 na Parlamento di Aruba na unda cu fraccion di AVP tabata presente pero e actualmente parlamentario Benny Sevinger no tabata t’ey.

Bon Dia Aruba a tuma contacto cu e lider di e partido Mike Eman despues di discurso di gobernador Alfonso Boekhoudt na Parlamento unda el a splica cu Sevinger no por a tabata presente pasobra el a bira welo y esey tabata su prioridad cu no tin nada di haber cu temanan cu a wordo discuti, manera a keda conoci su yiu muhe Stephani tabata na estado ora su tata a keda deteni pa loke ta trata e Caso penal Avestruz.

Faltando tres luna pa fin di aña, ainda no tin presupuesto cu tabata supone di ta cla 1 di september pero esey no a pasa y aña parlamentario a habri, a puntra con Eman y su partido ta mira esaki y el a declara cu discurso di apertura di Aña Parlamentario nobo y e hecho cu no tin presupuesto ta un parti di un realidad ‘doloroso’ cu nan no a sinti cu a sali for di discurso di gobernador, el a enfatisa cu discurso di gobernador no ta di dje y cu no ta un critica riba dje sino un critica riba e gobierno cu a produci e texto.

“Si bo mira e texto di awe, e ta un texto hopi abstrai, un texto cu no ta refleha e realidad na Aruba”, el a señala.

Asina mes, Eman a trece dilanti cu gobernador a papia di democracia pero “nunca antes den historia di Aruba tabatin un momento cu tabatin tanto duda den e proceso electoral cu e aña electoral aki, el a inicia for di comienso caminda cu tabata insisti cu votacion mester bay den forma digital sin consulta cu partidonan politico, esun di mas grandi, y na e momento ey partido AVP tabatin su inkietud, tabatin un electorale raad cu tabata kier insisti, despues di hopi protesta e no a bay door, despues nos a mira cu a nenga di kiesregister pa por a controla e proceso electoral y esey a haci cu partidonan no tabatin e chekeo na tur urna electoral manera normalmente por a efectua, kiermen a keda un duda riba e proceso electoral y despues tabatin hopi duda den conteo, tabatin evidencia caminda tabata conta cierto votonan invalido y cu tabata perhudica claramente e eleccion aki, ” Eman a sigura.

Tambe, el a comenta cu nunca antes un proceso electoral a laga atras hopi duda na unda cu tambe a destrui stembiljet cu a haci cu henter un proceso legal ya mas no tin sentido.

Loke segun Eman tambe a resalta diamars ultimo den discurso di gobernador tabata cu el a papia casi mey ora den un discurso cu manera el a sigura, “Evelyn Wever-Croes a prepara p’e y e palabra pobresa no a cay un minuut den e trinta minuut cu gobernador a papia”.

Si tin algo cu ta creando un inkietud y un dolor den comunidad na e momento aki ta e pobresa grandi cu tin den tur e barionan y hogar cu el a conta cu el a bishita y el a mira muchanan sin pan, problemanan pa muchanan por paga scol, tambe el a bisa cu el a mira hende desemplea y hende cu a bandona Aruba pa bay biba otro caminda pa motibo di e pobresa cu Aruba tin na e momentonan aki.

Ademas, Eman a declara cu pa via di tur medidanan cu a implementa y tur e kitamento di placa, e totalidad di BBO di e medidanan di awor y esun cu no a bin ainda a crea un pobresa grandi den comunidad, asina mes el a afirma cu den discurso di gobernador e no scucha un reconocemento pa e dolor aki, ni un reconocemento cu tin cu resolve e problema di pobresa, “esey ta haci cu lo cual awe a wordo presenta aki ta totalmente abstrai, distancia di e realidad doloroso cu Aruba ta bibando na e momentonan aki”.

Ademas, plannan pa aña 2022 y siguiente añanan lo ta marca pa plan di reforma cu COHO lo supervisa, e puntonan global mas importante ta conoci manera reforma fiscal, restructuracion di aparato publico, cambio den ley laboral, tambe a puntra Eman con partido AVP ta mira esaki pa loke el a manifesta cu esey ta un otro prueba di lo cual a wordo mira diamars ultimo den e discurso cu manera el a menciona “ta un declaracion di gobierno caminda cu e realidad no a wordo discuti of elabora riba dje, e tres punto aki hopi importante, ningun di tres a bini den e presentacion di awe y cu gobierno ta coriendo for di e realidad aki pa haci como si fuera cu nan no ta existi na e momentonan aki”, Eman a afirma.

Pa finalisa, el a splica cu gobierno a firma un pa un reforma fiscal cu ta bay trece un BTW di 12.5% riba e pueblo Arubano y cu tambe a firma un landspakket cu ta bay reforma nos leynan laboral na unda cu un doño di trabou no por retira un trahado, sino cu e mester pidi departamento di Labor permiso, e reforma laboral ta bay haci e posibilidad pa un doño di trabou por yega y kita un hende for di trabou.

“Tin un landspakket cu hopi medidanan pero cu consecuencianan hopi grave pa nos hendenan, e problema mayor den nos pais na e momentonan aki ta pobresa”, Eman a comenta.