ORANJESTAD – Durante un conferencia di prensa cu Minister di Enseñansa, Ciencia, y Desaroyo Sostenibel, Armando Lampe, a haci dialuna pasa, el a trece dilanti varios topico, por ehempel e MoU cu su ministerio a haci cu Stichting Rancho pa duna importancia pa e historia di educacion cu tur loke ta trata piscamento, y tambe e promocion di e profesion di piscado den e sistema di enseñansa na tur generacion.

Pa e motibo aki, el a splica cu el a asisti na e apertura di e conferencia internacional organisa pa UNESCO tocante e problematica di ocean, y cu Nacionnan Uni ta bay declara e decada di 2021-2030 como decada di Oceano, pa Aruba por tuma na serio e retonan cu e isla ta enfrenta como sargaso, e problematica di e coral reef, y e consecuencia di e turismo.

Lampe a duna di conoce cu gobierno a firma un MoU cu LeerOrkest Amsterdam pa introduci y promove e enseñansa di musica den Tra’i Merdia, den e sistema di ‘na schoolse opvang’. Manera Lampe a sigura, musica ta forma parti di desaroyo y ta hopi importante pa stimula e creatividad den e muchanan, y asina den futuro lo por bira un leerorkest Aruba tambe.

Siguiendo cu cooperacion internacional, Lampe a comenta cu su ministerio a cuminsa cu e proyecto di ‘fietsonderwijs’ cu tabatin un training hunto cu un tayer cu a tuma luga na IPA, pa e maestronan por bira e educadornan di bicicleta den e sistema di enseñansa. E concepto ta bay tin dos proyecto piloto, un na Pius X School na Dakota y otro na Filomena College di San Nicolas, unda ta bay cuminsa introduci e conocemento di bicicleta den e sistema di enseñansa.

Lampe a expresa cu esaki ta posibel pa via di un acuerdo di colaboracion cu gemeente Den Haag, pa loke ta trata e conocemento di bicicleta desaroya cu tur hende por siña di nan. Den e cuadro aki tambe, Lampe a sigura cu diferente ambtenaar di gemeente Den Haag ta na Aruba y nan a ofrece e tayer.

Henter e parti e fiets educatie no solamente tin un balor adicional pa loke ta reglanan di trafico, siguridad den trafico, pero tambe na nivel di movecion di salud cu por motiva pa e personanan cu ta biba na Aruba, cu manera minister a bisa, ‘ta hopi sedentario y no ta gusta move hopi’.

Tambe Lampe a anuncia cu nan lo continua cu e ‘Middag Mavo’ cu a cuminsa na luna di mei y cu lo continua pa motibo cu e necesidad t’ey. Na e momentonan aki e Middag Mavo ta na San Nicolas y lo sigui na augustus tambe den area di Playa.

Pa finalisa, Lampe a duna di conoce cu e siman aki lo bay tin e Nationale Toets cu ta parti di e maneho nobo cu e gobierno ta implementando, tur e studiantenan cu ta den zesde klas lo haci e toets nacional aki, pa hunto cu tur den enseñansa primario y cu e consehonan cu a drenta caba di e cabesantenan di scol, nan por sa cua ta e miho scol cu lo ta fit miho na e habilidadnan di e muchanan, pa respeta lo mas posibel pa cada mucha ta na e scol cu e merece y cu ta mas cu su capacidad, pa por sigui cu su desaroyo.

Esey tambe lo keda implementa e siman aki, pa tur e cambionan cu nan ta haciendo na beneficio di e futuro generacion.

Asina mes, Lampe a expresa cu nan a yega na un acuerdo hunto cu Natuur en Milieu- Educatie Project pa e cooperacion cu e scolnan, pa siña e muchanan desde chikito e mentalidad di desaroyo sostenibel y cuida medio ambiente. El a informa cu siman aki ta bin un ambtenaar di gemeente Den Haag pa sigui desaroya e material, y asina na augustus ofrece e prome resultado.