Casualmente e siman aki a marca net 6 aña cu ex Prome Minister, Mike Eman, a dicidi di drenta un welga di hamber pasobra Gobernador di e tempo ey, sr. Fredis Refunjol, a nenga di firma e presupuesto bou instruccion di Hulanda. Un tempo bastante tenso pero cu a marca nos historia politico na Aruba di un forma negativo.

Y awe, 6 aña despues, nos ta pasando den un crisis sin precedente danki na e pandemia di COVID-19. Despues di a traha sumamente duro pa por a sanea e desaster financiero cu nos Gobierno a hereda, e crisis di COVID a yega pa duna nos un gran golpi, net na momento cu e panorama financiero tabata mustrando hopi positivo pa Aruba.

Esaki tabata un siman di hopi tension y preocupacion pa nos pais. Pasando den incertidumbre pa sa si Hulanda lo fia nos e di 3 tranche di apoyo financiero pa Aruba cumpli cu su debernan y nos por keda sobrevivi den e tempo dificil aki. Nos Gobierno a haya e documentacion oficial caminda a realisa con Hulanda a pone condicionnan sumamente estricto pa acorda den practicamente 5 dia.

Pero decisionnan di un enbergadura asina grandi no por wordo tuma den lapso di menos cu 5 dia, mucho menos ora ta trata futuro di un pais. Pero asina mes nos Gobierno diligentemente a tuma e decision di sinta cu tur sector cu ta conforma nos pais pa asina splica nan, segun nos tabata por, e situacion real actual. E mensahe tabata hopi cla y e mesun dia ey nos Prome Minister, sra. Evelyn Wever-Croes, a tuma un avion rumbo Hulanda pa asina haci tur loke ta den su poder pa negocia un mihor propuesta pa Aruba.

Cu e determinacion y curashi cu semper a caracterisa su persona, y pa loke cu nos semper a admir’e, Premier Evelyn Wever-Croes a yega Hulanda pa personalmente purba acorda e mihor solucion na bienestar di nos Pais. Esaki ta e actitud di un Lider cu tin su pais na pecho realmente! Y nos MinPres a logra haya un tempo adecua pa negocia cu Hulanda, cual ta duna nos Gobierno e espacio necesario pa por analisa e propuesta mihor y asina hunto por yega na un conclusion y eventual solucion.

Esaki ta e momento pa nos pais uni bou di un solo capa y lucha hunto pa reconstrui nos pida baranca stima. Y como Arubianonan balente y luchador, hunto nos lo logra pone nos pais bek ariba pia y mas fuerte cu nunca. Pero esaki lo tuma sacrificio for di nos, e ta exigi perseverancia y fortalesa, algo cu no ta desconoci pa nos hendenan. Awor mas cu nunca nos mester laga tur guera politico un banda y uni bou di nos sentimento y amor patrio, pa lucha pa e bandera cu tanto a costa nos pa logra.