Despues cu FADA a ricibi training intensivo pa loke ta bay bira e programa di B-Smart, awor por bisa cu meta ta pa introduci esaki entrante aña escolar nobo. Segun un comunicado di gobierno, cu fondonan aloca pa Ministerio di Salubridad Publico, orguyosamente por realisa e proyecto B-Smart encarga pa FADA.
Programa B-Smart
E programa di B-Smart ta un programa di conscientisacion riba salud mental pa muchanan di klas 5 y 6. E programa aki ta siña e muchanan kico ta adiccion.
E programa di B-Smart ta enfoca riba cuater (4) aspecto: Alcohol, humamento, droga y gaming & internet. E enfoke pues ta riba e parti di adiccion, principalmente di forma preventivo. Esakinan ta ser duna durante cuater (4) siman consecutivo na e muchanan. E idea di e programa ta pa e ta uno interactivo, den cual lo toca diferente topico manera peer pressure y uzo di substancianan. Mediante ehempelnan bibo ta siña nan reconoce tambe kico ta pasa rond di nan ambiente y pa asina reconoce factornan di riesgo pa cu adiccion, sea na cas y/of den seno di amigonan.
Di e forma aki kier logra prepara e muchanan pa tuma decisionnan responsabel y di forma consciente pa situacionnan cu ta bay presenta den nan bida diario ora cu nan yega scol avansa.
Programanan preventivo riba tereno di salud mental ta parti integral di e maneho cu Minister Dangui Oduber ta hibando, segun e comunicado. “Ta hopi tristo pa mira con durante un gobernacion di 8 aña FADA no a ricibi nada extra pa traha den e parti preventivo. Pa e motibo aki, awor e gobierno aki a aloca fondo pa FADA por opera manera mester ta.”
