Aruba Scholarship Foundation ta un fundacion cu a lanta 30 aña pasa cu e obhetivo di duna un asistencia financiero pa studiantenan mas vulnerabel y merecedo den e comunidad di Aruba. Siman pasa, e fundacion a celebra den un acto conmemorativo e apoyo cu nan ta dunando pa 21 studiante, cu na e momentonan aki lo bay studia na otro pais cu e ayudo di Aruba Scholarship Foundation.
Durante un entrevista cu Bon Dia Aruba a tene cu Thais Nierop y Brian Marchena, miembronan di e fundacion desde varios aña pasa, nan a splica cu Clyde Harms ta un di e fundadonan cu a wak e necesidad pa yuda e studiantenan cu ta interesa pa bay studia un pais cu no ta Hulanda y unda por yuda nan financieramente.
Nierop a duna di conoce cu e aña aki nan a kibra record cu 21 studiante cu lo bay studia pafo di Aruba. E careranan mas solicita ta Biologia, Medicina, Psicologia y Ciencia. Tin ocho persona nobo cu pa prome biaha a acerca e fundacion, y 13 a acerca aña pasa pa mustra cu nan ainda tin e necesidad di haya e fondonan. Nan mester cumpli cu cierto criterio pa aplica, por ehempel, Nierop a manifesta cu den e prome semester, e studiantenan beca tin cu manda nan cifranan y mantene excelencia den nan studio.
El a bisa cu e aña aki tabata basta emocional, pa motibo cu tambe a otorga beca na 6 studiante, e premio ‘Clyde Harms Scholarship’ dirigi pa studiantenan cu ta excelente den nan studio. Un condicion importante di esaki ta cu ora e studiantenan ta caba di studia, mester bolbe bek, den e contract cu nan ta haya ta regarda cu nan mester bin bek Aruba pa traha.
Tambe nan a splica cu ora un persona naci na Aruba kier studia Medicina na otro pais, por ehempel Colombia, ta mas dificil pa motibo cu nan mester bay studia na Colombia y despues un aña na Spaña pa haci un specialisacion. Den futuro lo por cay den AruBIG, e sistema di registracion cu AZV ta exigi pa un dokter por traha na Aruba. Na Hulanda tambe ta existi y ta exigi cu persona cu a studia den otro pais mester pasa e BIG pa por eherce e profesion na Hulanda of Aruba.
Nierop a bisa cu mayoria di studiantenan na Aruba nan ta bay studia na Hulanda, cu den principio esunnan cu ta bay lo por logra, pero di otro banda ta cu na Merca y Canada specialmente ta sumamente costoso.
Di mesun manera, Nierop a comenta cu un studio pa cuater aña na Merca casi binti aña pasa tabata costa casi 80 mil dollar. E tempo ey Clyde Harms a acerca persona, principalmente di empresanan, pa nan por haci donacion di fondo y asina yuda e studiantenan.
Ademas, Thais Nierop a informa cu Harms a logra e Latin America and Caribbean Program (LACP) cu varios aña pasa cuminsa cune na Merca, den cual universidad, scol y colleges na Florida a ofrece un posibilidad pa studiantenan por paga tur e gastonan como un studiante Mericano y no como un studiante internacional; algo cu tin un efecto, ya cu manera el a afirma, ‘normalmente un studiante internacional ta paga tres biaha mas cu un local’.
Despues, pa via di un caida di economia Mericano diescinco aña pasa, a cancela LACP y e studiantenan ta haya mas dificultad pa por studia y e ora ey nan ta conta mas cu scholarship y sponsornan pa yuda cu e parti financiero.
Brian Marchena, kende tambe ta miembro di e fundacion, a bisa cu un biaha pa aña e proceso ta cuminsa na luna di april, e luna ey nan ta publica un formulario riba nan pagina di Facebook pa personanan por descarga e formulario, scan esaki y manda pa e fundacion.
Pa finalisa, Marchena a señala cu tin biaha ta existi muchanan cu ta studia hopi bon, pero nan ta bin di famianan humilde, y eynan e fundacion ta yuda nan cu cierto cantidad di fondo pa nan por logra di continua nan estudio den exterior. “Nos trabou no ta paga full nan estudio, pero nos te’y pa esunnan cu ta falta un empuhe chikito pa nos yuda nan di e banda ey”.
