Dialuna mainta Minister di Deporte Sr. Dangui Oduber tabata na Centro di Bario Dakota pa un recorido bou invitacion di e directiva di S.V. Dakota pa asina presencia e progreso di fase 1 di e masterplan di S.V. Dakota. Tabata algun tempo atras cu S.V. Dakota a presenta nan masterplan na Gobierno di Aruba cu un bunita proyecto pa e bario di Dakota.

E masterplan di S.V. Dakota ta un proyecto cu ta bay den diferente fase, e prome fase ta e fundeshi di entre otro un oficina, dos vestuario y un camber pa referee y linesman. A construi un facilidad cu cuatro baño y a cumpra un container cu ta fungi como un berghok pa warda material di training. Tambe a drecha e tribuna, tur esaki cu un contribucion chikito.

Minister Dangui Oduber ta kere den proyectonan cu ta yuda na aumenta e participacion di nos hobennan den deporte. P’esey Gobierno di Aruba y Ministerio di Deporte a compromete su mes cu S.V. Dakota pa duna nan un contribucion chikito pa nan cuminsa cu e fase 1 di e proyecto aki. Minister Oduber ta purba sigui yuda caminda cu por cu e fondo limita cu tin. Minister Dangui Oduber ta elogia directiva di S.V. Dakota cu a demostra cu nan ta dirigentenan serio cu un meta pa finalisa nan proyecto na aña 2022 caminda e club lo cumpli su 75 aniversario.

Minister Dangui Oduber tin deporte na pecho y lo sigui sostene iniciativanan asina cu ta contribui na mehoracion di deporte.

LEAVE A REPLY

Please enter your comment!
Please enter your name here