Durante un conferencia di prensa di minister di Salud, Turismo y Deporte, Dangui Oduber a trece dilanti e situacion di e piscadonan di area di Rancho, na unda e desaroyo di un proyecto di construccion a bin causando hopi polemica pa loke ta trata e area aki.
Pa cu esaki, minister a declara cu e ta lamenta e insinuacionnan cu a wordo haci pa un otro medio di comunicacion relaciona na e construccion den area na unda Waf’i Rancho ta, y cu den ultimo tempo ta causando molestia y disgusto pa piscadonan. Segun e piscadonan a señala, nan por keda sin acceso na e pier debi na e desaroyo aki.
Oduber a afirma cu director di Aruba Port Authority a clarifica e asunto aki y a afirma cu “na ningun momento lo kita e pier for di piscadonan ni limita e acceso di e piscadonan na nan pier”.
“Nos ta lamenta e manera con e noticia ta wordo treci dilanti como si fuera e desaroyador ta kita pier, kita acceso y prohibi publico tin acceso na dje”, el a bisa.
E tereno na unda esaki ta ubica a wordo duna door di ex-prome minister Henny Eman den añanan 80 y nan a duna pa cualkier futuro desaroyadoe henter e tereno aki y “loke nos ta lamenta ta cu e tereno tabatin 17 aña den ruina y cu awor cu kier embeyece e area tin discusionnan politico”, minister Oduber a enfatisa.
