Lo tene cuenta cu tur seguridad ora cu Eagle LNG pone e tubonan di gas for di tereno di refineria te na WEB y lo ta pa cuenta di e compania. Asina Minister di Energia, Glenbert Croes a sigura. E Minister a bisa cu mas cu nunca, mirando e situacion di combustible na mundo y e prijs halto, mester pasa pa gas natural, cu ta yuda den baha e efecto pa clima.

Pero e Minister, kende no conoce, segun su mesun declaracion, e contenido di e contract entre WEB NV y Eagle LNG, ta sigura cu e compania lo tene tur consideracion di medio ambiente, di seguridad y logistica na cuenta.

Tubonan

Manera ta conoci, na momento di a firma contract cu WEB, Sean Lalani di Eagle LNG a bisa cu ta bay usa e mesun ruta di tuberia cu tin awor aki entre e refineria y e planta di produccion di awa y coriente.

Sinembargo, e tuberia ta pasa den areanan residencial, for di Zeewijk te Balashi, cu ta inclui Mariniers Kazerne y areanan residencial na Savaneta y Pos Chikito. Comandante di Mariniers Kazerne a bisa Bon Dia Aruba cu e no tabata informa y cu un tubo di gas metano no ta bon idea pa pasa den un zona unda tin hopi ekipo explosivo.

Seguridad

Sr. Lalani a bisa cu gas natural ta menos peligroso cu e conexion di gas di cushina na cas y cu tin menos incidente. Problema no ta e cantidad di explosion, sino e impacto di un solo explosion. Na 2010, e comunidad keto di San Bruno, na California a pega candela debi na un ruptura den e tuberia di gas natural. E candela a destrui 38 cas, a mata 8 persona y a herida hopi otro. E tabata un di e explosionnan di tuberia di gas mas grandi den historia reciente.

Como tal, e U.S Pipeline and Hazardous Materials Safety Administration, PHMSA, a propone regulacionnan nobo na 2016. Nan ta pa atende cu e hecho cu pipanan cu ta transporta gas natural ta fuentenan pa polucion di metano, pa motibo di leak y ekipo cu no ta funciona bon. Como tal, mester percura pa control regular, incluso presion pa saca gas den areanan cu mester test. Hopi biaha ta laga e gas den atmosfera cu atrobe ta dañino. Como tal PHMSA a analisa formanan pa usa tecnologia pa captura e gas cu mester saca di parti di un tubo pa control, pa asina mitiga e daño na clima. Congreso bao Gobierno di Trump a pasa ley unda ta reenforsa algun di e regulacionnan proponi pa PHMSA, aunke a elimina hopi responsabilidad di e industria compara cu locual tabata e intencion, pero a keda e entidad cu autoridad pa controla e sistema di tuberia rond Merca. Como tal, e instancia gubernamental tin e responsabilidad pa bin cu reglanan basa riba risico, consulta cu trahadonan di e companianan cu ta transporta gas natural y tin acceso na tur dato di e companianan, como tambe revisa e plannan di mantenimento. E ley aki, den un forma revisa, a keda ehecuta bao Gobierno di Joe Biden, cu a pone mas fondo disponible pa asina percura cu tragedianan manera na California, pero tambe na Massachusetts y otro estado no bolbe sosode.

Aruba

Minister Glenbert Croes a enfatisa cu na Aruba, DTI ta encarga cu e supervision pa seguridad y cu DNM ta envolvi pa percura cu ta tene naturalesa y medio ambiente na cuenta. En todo caso, ta atendiendo cu e preocupacionnan di Mariniers Kazerne y ta buscando solucion, Minister a bisa. “Di loke mi por compronde, e asunto di permisonan y ruta, tur esakinan DTI, DNM y DOW lo tene cuenta di tur factor.”

Eagle LNG lo paga pa e tuberia di RDA y WEB lo inverti den su tereno pa por ricibi e gas. Minister ta kere cu mester acelera e proyecto mirando e desaroyo den prijs di combustible y su efecto riba tur prijs. “Esey lo duna nos un stabilidad pa prijs di awa y coriente cu comunidad y economia mester.”