Den dianan aki, henter mundo ta paralisa pa via di COVID-19, hendenan mester keda cas pa evita keda contagia cu e virus aki, tambe hendenan mas vulnerabel manera hende di edad avansa, y muchanan cu no ta bayendo scol y cu obligatoriamente mester cuminsa siña den nan mesun cas.

E situacion di ceramento temporal di scol na mas di 20 pais, pa via di e virus COVID-19, ta hiba cu scolnan tin cu continua nan proceso di enseñansa y siñamento a distancia. Riba internet varios website ta na disposicion di mayornan, docentenan, studiantenan y famianan cu contenido escolar gratis pa cu e siñamento por yega den nan cas.

Ayera a keda conoci un carta cu minister di Enseñansa, Armando Rudy Lampe a manda pa tur docente, cual ta señala cu desde awe 23 di maart no ta un periodo di vakantie. El a pidi pa scol bin cu un plan di educacion a distancia. Gran mayoria di docente tin computer, tur material ta accesibel pa nan, como tambe mayornan tin telefon pa comunica cu scol.

Di mesun manera, Lampe a enfatisa pa docentenan haci un sondeo cu su studiantenan pa establece ken tin y ken no tin acceso na internet na cas. A base di e sondeo aki por haya un bista di cua alumno tin dificultad pa sigui instruccion y haci ehercicionan via plataforma digital.

Docentenan por bin cu un solucion creativo pa alumnonan aki, Lampe a sigura, alabes informando cu Telearuba ta trahando riba un School TV.

Asina mes, el a duna di conoce cu tin material digital disponibel na www.ea.aw/catalogo cu por facilita e docente su preparacion di material.

Lampe a anuncia cu lo haci un excepcion pa e candidatonan pa eindexamen. Schoolexamen ta bay door na unda el a comenta cu e tin confiansa den docentenan cu tur di nan ta suficiente creativo pa yuda e hobennan caba nan scol.

Den e linea aki, Fundacion Hunga Teca a duna di conoce cu Squla di Hulanda a duna un cuenta den cual tur alumno di school basico na Aruba por haya oportunidad di haci uso di nan material digital di scol di un manera gratis.

Esaki ta posibel den siman riba tur dia di trabou, cu excepcion di diaranson desde 5or di marduga te 10or di mainta.

Den tempo di crisis ta importante pa e bida diario di un mucha ta sigui normalmente hunto cu scol haci materia indispensabel.

Pa e motibo aki nan a dicidi cu mayornan por aplica pa traha un cuenta gratis cerca Fundacion Hunga Teca pa nan yiunan di manera cu nan por sigui haci materia di scol online.

Nan a informa cu Hunga Teca ta traha hunto cu SKOA Y SPCOA. Maestronan di e dos fundacion aki cu no tin un cuenta ainda tambe ta haya oportunidad pa habri un cuenta gratis via nan.