Diabierna ultimo Conseho di Minister a aproba e proposicion di Minister di Husticia Andin Bikker pa aumenta castigo drasticamente pa delitonan di abuso di menor.
Segun e comunicado cu Bon Dia Aruba a ricibi, ta bisa cu e castigonan di 12 aña lo aumenta pa 16 aña. Pa cierto delito cu actualmente e castigo ta hopi abou, e cambio ta nifica tripel esta di 2 aña lo bira 6 aña of redobla di 4 pa 8 aña di castigo.
E decision aki ta nifica tambe cu den mas caso lo bay over na detencion preventivo. Den acuerdo di gobernacion di gabinete Wever-Croes, a haci compromiso cu Aruba, caminda ta bay dedica atencion specifico riba e tematico aki. Tambe ta ahusta e areglo di ‘verjaringstermijn’ (estatuto di limitacion) por ehempel si un persona despues di 20 aña tin e curashi di enfrenta e echo cu un hende hopi cerca di dje a falta respet pe ora e tabata menor di edad y e bin dilanti ainda e crimen ey no a caduca. Un otro aspecto ta e conseho di Centrale Raad voor Reclassering cu ta duna conseho ora di laga personanan den libertad condicional.
Awor Minister di Husticia por dicidi si e ta haya cu un tipo di crimen ta hopi serio, semper e persona cu ta politico responsabel mester por bisa cu e tin otro opinion y e persona ta sinta su castigo maximo. Un otro ley cu ya caba ta hopi leu, ta e Codigo di Procesamento Penal nobo. Den esey ta introduci entre otro e derecho di e victima y tambe hende hopi cerca por ehempel un representante legal. Ta hopi importante pa proteccion y derecho di e victima y e persona rond di dje cu ta sufri di un crimen por hiba palabra. Hues por tuma den consideracion ki tipo di castigo pa impone y por tene na consideracion ki impacto e crimen tabatin riba e victima y su medio ambiente. E ley ta bay Raad van Advies y ora e bin bek e ta bay Parlamento y Minister ta spera cu pa september, october e por drenta na vigor. Minister Bikker ta keda traha na bienestar di comunidad y sigur proteccion di nos muchanan.
