ORANJESTAD – Como un ‘gold opportunity’ pa desaroya turismo pariba di brug y pa promove actividad economico na San Nicolas, minister di Infrastructura Otmar Oduber (POR) a cualifica e proyecto hotelero na Sero Colorado riba e halto panort di Baby Beach. El a afirma cu gobierno di coalicion (MEP-POR-RED) ta kere den un desaroyo turistico hotelero pa e area di San Nicolas.

E ta un proyecto di 900 camber cu a sali na luz publico siman pasa, ora cu organisacionnan ambiental y NGO’s a cuminsa reacciona riba e rapport cu a wordo traha pa Sustainable Solutions Consulting NV, riba un evaluacion di impacto ambiental.

E mandatario en cuestion a laga sa cu e draft di evaluacion a yega den man di e diferente organisacion ambiental, debi cu esaki a wordo manda pa nan den cuadro di e maneho nobo cu ta wordo hiba y di transparencia. Ta un obligacion pa esun cu ta traha un rapport di impacto ambiental (MER) pa scucha y atende cu ambientalista na Aruba. Tambe nan mester skirbi e reaccion di e medio ambientalista den e rapport.

Segun e mandatario, nan ta dispuesto semper pa evalua e proyecto aki, ya cu e mester ta den un balansa. Un ehempel cu el a trece dilanti ta e famoso proyecto turistico na Isla di Oro. Sinembargo, e ta e minister cu a dicidi di para e proyecto di Isla di Oro. A pesar cu el a yega di sostene e proyecto aki den pasado, awor den su rol di minister di medio ambiente, el a para e proyecto aki.

Por cierto, encuanto kende ta tras di e proyecto aki, e mandatario no kier bay mucho den detaye, pero el a indica cu ta inversionistanan di afo. Nan ta un grupo di financiado cu tambe tabata parti di Isla di Oro, y cu ta interesa di financia e proyecto aki.

E grupo interesa pa realisa e proyecto aki, no tabatin anteriormente proyectonan na Aruba y nan ta trahando proyectonan nobo, el a declara na e matutino aki. E grupo aki a separa for di otro y nan a forma un consorcio nobo, hunto cu AIB na Aruba.

“E ta un grupo completamente nobo cu no tin desaroyonan akinan. Esaki ta bay bira nan prome proyecto.” Nan no tin di haber cu un supuesto proyecto na Boca Prins tampoco, el a bisa. Tambe durante e conferencia di prensa, e mandatario a bisa cu ‘no tin secreto’ tras di e proyecto aki, ya cu nan ta aparece den e registro di DIP. Te hasta den e rapport riba impacto ambiental di e proyecto aki cu a wordo manda pa tur organisacion medio ambiental.

Te ainda e grupo interesa ta den proceso pa cumpli cu tur exigencia pa realisa e proyecto aki, pa asina bin na remarca y pasa e acta. E ta garantisa cu e proceso aki lo tuma luga den forma transparente. Segun e draft di e rapport di Environmental Impact Assessment (EIA), e proyecto ta un iniciativa di e compania local Three Rivers Real Estate NV, estableci na juni 2004. E unico director actual ta Intima Management NV. Directornan Milena Solognier, Marianela Solognier y Yolanda Clemencia Rojas.

E operado lo bira eventualmente Apple Vacation. Te aworaki, e grupo tin un opcion cu a haya aña pasa. E opcion ey -mirando e prioridad cu gobierno tin pa e proyecto- pero tambe cu nan tabata forma parti di un grupo cu tabatin un contracto caba cu pais Aruba, nan a haya un periodo di 4 luna for di dia cu nan a ricibi e opcion den nan man, pa cumpli cu tur regla stipula. Oduber a bisa cu ya caba parlamento a wordo informa cu nan ta bezig cu e proyecto aki.

Ainda nan tin cu entrega documentacion na DIP, y evaluacion mester tuma luga a base di e documentonan cu nan ta entrega. Si nan ta cumpli, nan ta bay na remarca pa firma e acta pa haya e tereno y cuminsa desaroya e construccion.

Oduber a bisa cu e ta un proyecto cu ta duna su persona e confiansa cu e lo bira realidad, mirando e seriedad cu tin riba aspecto financiero y di esunnan cu ta tras di dje. E ta spera cu e aña aki mes e prome bloki ta wordo poni. El a indica cu despues di hopi aña di discusion riba desaroyo turistico na San Nicolas, e momento a yega pa e desaroyo aki por bira un realidad.