Ayera mainta, minister di Proteccion di Derecho di Hulanda, Franc Weerwind a reuni cu prome minister di Aruba, Evelyn Wever-Croes y minister di Husticia, Rocco Tjon, kende a duna minister Weerwind y su delegacion un bon bini pa su bishita laboral na Aruba.
E bishita a keda anuncia algun siman atras riba e agenda oficial di minister Weerwind, como parti di su bishita pa cera conoci cu e islanan Aruba, Bonaire y Corsou.
Riba su pagina di Facebook, minister Tjon a informa cu a tene un reunion cu Weerwind, durante cual a discuti diferente topico manera e rapport di CPT (Comision Europeo pa Prevencion di Tortura) y e recomendacionnan haci pa e cadena hudicial. E comision CPT ta audit e centronan di detencion riba diferente aspecto, manera infrastructura, higiena y e trato cu e detenidonan ta haya door di e profesionalnan cu ta traha na e centronan di detencion. Na mei di aña pasa, e comision CTP a audit varios lugar na Aruba, manera KIA, wardanan di polis y Guarda Nos Costa.
“Den cuadro di esaki tambe a toca e puntonan cu ya caba nos ta deliberando riba dje cu Hulanda, manera e falta di personal den e cadena Hudicial y e problema di detencion,” Tjon a indica.
Despues di e reunion na bestuurskantoor, minister Weerwind y e delegacion Hulandes a haci un recorida na KIA. “Aruba ta trahando pa september venidero tin e dossier completo pa traha un instituto nobo cla. Pa cu esaki nos ta ricibi ayudo di e ministerio y departamentonan di Sr. Weerwind, pa cual nos ta hopi agradecido,” Tjon a bisa.
Mirando cu e bishita di minister Weerwind, segun su agenda oficial, tabata programa pa tuma lugar na Aruba dia 23 di mei, Bon Dia Aruba a acerca vocero di minister Tjon pa puntra tocante e bishita di Weerwind, si esaki a tuma lugar y ki puntonan a wordo trata. Sinembargo, no a logra haya contesta riba esaki. No a keda cla si minister Weerwind a yega Aruba dia 23 of dia 24, sinembargo, segun publicacion di minister Tjon riba rednan social, e bishita na KIA lo a tuma lugar diaranson dia 24.
Esaki ta nifica cu e bishita a tuma lugar net un dia despues cu un persona a fayece na e centro coreccional.
Diamars atardi a drenta informe indicando cu tin un persona cu no ta duna señal di bida, mesora a dirigi tur autoridad competente na e sitio. A bin resulta cu aki trata di un preso di alrededor di 30 aña conoci como Sint Maarten. E causa di su morto ta siendo investiga. Riba medionan di comunicacion local a indica cu e persona por a bira malo pa motibo di calor, pero esaki no a keda confirma pa autoridadnan.
