Minister di Salud, Turismo y Deporte, Dangui Oduber a ofrece un conferencia di prensa ayera dialuna, pa trece dilanti e decisionnan cu AZV mester a tuma door di e crisis economico cu coronavirus a causa na Aruba.

Esaki ta trata di un reduccion di 5 miyon florin cu Hulanda a exigi como un di e condicionnan, y pa e motibo aki gobierno a institui un comision cu ta wordo yama ‘Comision Zorgtoeslag’ of subsidio di cuido cu ta conforma pa AZV, SBV, Ministerio di Salud, Turismo y Deporte, Departamento di Impuesto, Departamento di Asunto Social y DWJZ. Nan ta esunnan encarga di duna conseho na e Ministerio di Salud, Turismo y Deporte con por introduci un subsidio di cuido pa pashentnan den exterior, cu lo ricibi un 50% menos di daggeldvergoeding.

Asina mes, Oduber a señala cu pa begeleider e daggeldvergoeding a wordo elimina, pa asina por ofrece transporte pa personanan cu no ta wordo cubri mas pa AZV y tambe pa eigen bijdrage. Oduber a enfatisa cu e mision di e comision aki ta pa di aki pa dos siman nan bin cu un conseho pa gobierno di kico ta bira e categorianan, ken ta e personanan cu ta bin na remarca y kico ta bira e subsidio di cuido pa cu e persona.

El a bisa cu pa e grupo aki ta importante pa nan por tin luga pa personanan mas vulnerabel, pa percura cu nan tin continuidad di e cuido cu ta brinda nan. Tambe el a sigura cu nan a tuma decisionnan cu ta pafo di e ley di AZV, por ehemplo, transporte di e pashentnan na momento cu nan mester di cuido den exterior, cu nunca tabata wordo cubri pa ley.

Di loke ta trata pashentnan cu ta ricibi dialisis, el a comenta cu esey ta sigui wordo cubri pa AZV pa pashentnan cu ta den cama, rolstoel of cu no por cana. Otro pashentnan mester tuma contacto cu nan famia pa por hiba nan of nan mes tin cu paga nan transporte.

Na e momentonan aki ta vigente caba den cooperacion cu Imsan y hospital cu gobierno ta bay percura pa tin transporte na tur momento pa pashentnan cu ta dialisa, si nan ta biba cu un pension di AZV of si nan ta biba di bijstand cu no tin transporte di parti di ni un miembro di nan famia y cu no por paga transporte.

Di mesun manera, Oduber a expresa cu esaki ta un situacion fastioso pa gobierno y pa AZV pa via di e medidanan cu a tuma. “Simplemente nos ta wordo instrui, obliga y nos no tin otro opcion.”

 

LEAVE A REPLY

Please enter your comment!
Please enter your name here