Aruba lo traha cu hospital di Corsou y Sint Maarten pa evita manda pashent Colombia

Durante un conferencia di prensa pa medionan local, minister di Salubridad, Deporte y Turismo, Dangui Oduber a duna di conoce cu dia 3 di juli tin un conseho di minister di Reino, unda Ministerio di Salud tin cu presenta e plan di reduccion di AZV di 5 miyon florin.

Di esaki, el a anuncia cu nan tambe lo bay traha di un manera structural cu hospital di Corsou y Sint Maarten pa un miho cooperacion, pa asina evita cu tin cu manda pashentnan pa Colombia. Segun Oduber mes a sigura, Gobierno Hulandes a prefera di no manda mas pashent pa Colombia mas pa nan wordo trata sea na Aruba, Corsou of Sint Maarten.

Loke Hulanda kier ta haya un acuerdo entre e tres hospital aki, pa tin un gezamenlijke inkoop entre e tres isla pa remedinan, pa asina nan por cumpra remedinan hunto y baha e prijs cu ta pagando aworaki. Tambe un miho colaboracion di laboratorio. E plan aki lo wordo presenta pa asina wak con gobierno ta bay sigui.

Pa loke ta trata turismo, el a sigura cu algun turista a cancela nan reservacion pa bin Aruba pa via cu a implementa seguro pa Covid-19, pero esey no ta motibo di preocupacion. El a manifesta cu na momento cu turistanan ta informa di kico ta e beneficionan di e seguro aki, esunnan cu a cancela nan mes por reevalua nan biahe, pa motibo cu ta pa nan propio proteccion cu Aruba ta ofrece e seguro aki.

Pa dia 1 di juli frontera lo habri pa Canada y Europa y 10 di juli pa Merca. Oduber a informa cu pa via di casonan di Covid-19 na Merca, Aruba tabatin e deseo di habri frontera pa Merca gradualmente, cuminsando cu estadonan cu no tin hopi caso di Covid-19. Pero manera e mes a expresa, nan a papia cu Ministerio di Transporte na Merca y nan a duna di conoce cu esey no ta posibel, pa motibo cu frontera lo habri pa full Merca of ta keda cera y esey a complica e situacion pa Aruba.

Di mesun manera, Oduber a sigura cu casonan positivo di Covid-19 na New York, Boston y Masachusets cu ta mercado di principal di turistanan pa Aruba ta bahando y esunnan cu ta subiendo ta na estado di Florida cu no ta considera como mercado principal.