Proyecto di boei pa mehora siguridad di lama lo start e siman aki Den un conferencia di prensa ayera mainta Minister di Salubridad Publico y Turismo, Sr. Dangui Oduber, conhuntamente cu CEO di Aruba Tourism Authority (ATA), Sra. Ronella Croes a lebaora ariba e proyecto di restauracion y colocacion di boeinan na e area di Arashi, Malmok y Palm Beach.

Minister Oduber a expresa su satisfaccion cu turismo di Aruba ta recuperando. El a splica cu luna di october tabata un bon luna di recuperacion caminda a recupera 88% di e turistanan den comparacion cu october 2019. A recupera tambe 94% di e turistanan Mericano cu ta e mercado mas importante, mercado principal, cu ta genera mas entrada pa economia di Aruba cual ta hopi importante den cuadro di recuperacion.

Manera menciona na diferente ocacion, e maneho cu Ministerio di Turismo ta hibando conhuntamente cu ATA ta dirigi ariba e turista afluente, e turista di calidad, e turista cu ta gasta y laga hopi placa atras den e economia di Aruba, y minister ta splica cu e turista aki sigur tin demandanan ora nan bin Aruba. “Nan kier un bon infrastructura, nan kier bon comodidady nan kier tambe pa nan seguridad wordo garantisa”, el a bisa.

Den cuadro cu esaki for di hopi tempo caba Ministerio di Turismo conhuntamente cu ATA ta analisando e producto Aruba den su totalidad pa wak unda mester haci inversionnan necesario pa mehora producto Aruba pa brinda un servicio di nivel na tur e bishitantenan.

Minister Oduber a señala cu pa hopi tempo caba e boeinan, den e area di Aarashi, Malmok y tambe Palm Beach, no ta den e miho estado. Prome cu e pandemia intencion tabata pa bin cu un reparacion di e boeinan y caminda cu no por drecha esakinan pone boeinan nobo, pero pandemia a pone un pause ariba e proyecto aki, pero aworaki, mirando e recuparacio di turismo, e proyecto por ranca sali.

“Pandemia a pone cu e fondonan tabata limita cu nos no por a drecha tur e boeinan, pone boeinan nobo manera cu nos tabata desea, pero mirando cu turismo ta recuperando y ora turismo ta recupera e situacion financiero di ATA obviamente tambe ta conoce un recuperacion, y den e caso aki tabatin fondonan disponibel back cu nos por haci e inversionnan necesario pa mantene e boeinan cu por wordo manteni y tambe pone boeinan nobo”, Minister Oduber a indica.

El a expresa cu e ta hopi contento cu e proyecto aki pasobra e ta garantisa e “seguridad pa e landadonan local cu ta haci uso di e lamanan den e areanan aki y tambe tur e turistanan cu ta haci uso di nos playanan” enfatisando e importancia di e proyecto aki.

“Manera ta wak no tin boei na e momentonan aki, hopi di nan no tabata den bon estado, pesey nan mester a haya mantencion. Tin caminda cu mester pone boeinan nobo, kiermen e proyecto aki sigur ta un stap den e direccion cu nos kier bay pa producto Aruba pa den e caso aki por garantisa e seguridad cu ta hopi importante y essencial pa nos localnan y tambe e turistanan cu ta haci uso di e areanan aki”, el a agrega.

Minister a gradici CEO di ATA, Sra. Croes, pa pone fondonan disponibel pa ehecuta e proyecto aki. El a menciona cu tin hopi mas proyecto cu Ministerio di Turismo y tambe ATA ta bay anuncia den e siguiente lunanan den cuadro di mehoracion di producto Aruba, den cuadro di maneha e fluho di turistanan cu ta bishita e diferente atraccionnan. El a splica cu tur esaki ta poni den e presupuesto di ATA, den e corporate plan cu a wordo presenta algun siman atras caba.

“Tin hopi proyecto bunita y positivo cu ta bay garantisa no solamente e seguridad pa nos turista pero tambe un mehoracion di nos producto cu ta asina importante pa e turistanan cu nos kier atrae. E turistanan aki tin cierto demanda y ora nan bin Aruba nos tin cu cumpli tambe cu e demandanan aki te caminda cu nos por cu e fondonan cu nos ta dispone di dje”, el a bisa.

CEO di ATA, Sra. Croes a indica cu e proyecto aki ta un di e prioridad pa e oficina di turismo. No solamente pensando ariba e seguridad di e bishitantenan y localnan, pero tambe e hecho cu ariba e hecho e playanan di Aruba ta un di atributonan mas importante como como producto y un parti integral di e oferta turistico.

El a splica cu ya caba for di 2016 ATA ta invertiendo den boeinan, y el a menciona cu fuera di ATA, Tourism Product Enhancement Fund, pues pa medio di fondonan di gobierno aki tambe a contribui cu e colocacion di boeinan.

“E boeinan ta hopi importante pasobra nan ta designa e area unda cu e usuarionan cu ta landa por haci uso di nos playanan na un manera mas sigur y e ta distingui tambe e area pa usuarionan cu ta haci uso di nos playanan pa medio di boto y otro tipo di vehiculonan di lama”, el a bisa.

Sra. Croes a señala cu e proyecto aki ta acapara e areanan di Arashi, Malmok, Tres Trapi, Palm Beach y Costa Linda. E areanan aki lo bay mira reparacion di boeinan of colocacion di boeinan nobo. Pa ATA esaki ta un proyecto di mas o menos 225 mil florin y tin un duracion di 6 siman y lo ta inciando e siman aki.

E provedor di servicio pa e proyecto aki ta Varadero y el a señala tambe cu no tin mucho provedor di servicionan asina aki na Aruba. “Nos tin experiencia cu e provedor aki y nan lo ta encarga cu colocacion y reperacion di e boeisnan”, el a informa.

El a indica cu den ultimo temponan tabatin diferente retonan pa cu e topico aki y conhuntamente cu e provedor di servicio, Varadero, y tambe Sea Solutions, cu tambe tin experiencia den e area aki, ATA a bin ta haci nan esfuerso pa asina brinda e seguridad aki unda cu por.

Diferente material a wordo recicla y reusa tambe, pero segun Croes ta splica na dado momento mester pasa over na coloca boeinan nobo y haci reperacionnan cu ta un tiki mas amplio, y esey ta netamente locual ta bay inicia e siman aki. El a enfatisa cu e proyecto lo keda un prioridad pa ATA y manera indica caba for di 2016 ya caba nan ta invirtiendo den esaki.

“E ta parti di presupuesto pa otro aña tambe, no solamente pa coloca y repara loke tin aworaki, pero pensando ariba mantencion cu ta asina importante tambe”, el a agrega.

Sra. Croes a gradici Ministerio di Turismo y e hunta di supervision di ATA pa duna nan sosten pa por continua cu tipo di proyectonan asina. El a indica cu ATA lo sigui cu proyectonan cu ta enfoca no solamente ariba nos playanan, pero tambe ariba e seguridad pensando ariba nan contribucion na Aruba Hospitality and Security Foundation y pensando tambe ariba e nivel di servicio y diferente otro proyecto pa asina eleva e experiencia di e turista y localnan.