Minister di Husticia y Asuntonan Social Rocco Tjon ayera mainta a duna un conferencia di prensa pa trece clarificacion tocante e siguridad di fronteranan di Aruba y ademas a papia riba e topico di Family Justice Center.

Manera a keda conoci dianan pasa, un boto cu 5 persona indocumenta a drenta na Aruba na unda un detencion a cay y tin un investigacion andando riba e caso aki, preguntanan di parti di comunidad y miembronan di prensa a bin dilanti tocante esaki.

Tjon a splica cu nan tin un plataforma caminda tur e hefenan di departamento cu tin un responsabilidad primordial riba e area aki ta reuni cada dos siman, esaki ta trata di Cuerpo Policial, Inmigracion, Warda Nos Costa, Kurstwatch, entre otro.

Esaki ta keda importante segun Tjon a indica pa asina nan por delinea tur e proceso di trabou riba otro, pa asina purba di evita cu e casonan aki lo sigui tuma luga lo mas tanto posibel, inversionnan pa loke ta trata radar y inversion den tecnologia tambe ta forma un parti di e maneho.

Reunion cu Sindicato di Aduana Diamars ultimo, ministerio di Husticia a reuni cu diferente departamentonan concerni pa loke ta trata proteccion y cuido di fronteranan di Aruba, den esaki Sindicato di Aduana a informa na Bon Dia Aruba den su edicion di ayera diaranson cu nan a keda hopi desapunta pa motibo cu nan no a wordo invita pa e reunion aki cu tabatin di haber cu fronteranan y cu Aduana ta haci un trabou hopi importante den e parti aki.

Tjon a expresa cu el a tene un reunion cu e presidente di Sindicato di Aduana (SADA) esta Edward Maduro diaranson ultimo na unda cu nan a papia tocante e impresion robes cu a crea cu Aduana no a wordo invita na e reunion.

El a declara cu Aduana tabata pertenece na ekipo di vigilancia di fronteranan den pasado pero sinembargo, pa motibonan di capacidad nan no a forma parti mas di e ekipo den ultimo tempo aki, debi na esaki den reunion strategico cu nan tabatin el a haya cu ta necesario pa Aduana ta back na mesa y explora posibilidadnan pa traha mas di cerca cu Arubaanse Militaire (Arumil).

Esey ta un decision cu a wordo tuma segun Tjon a menciona y den e siguiente reunion Aduana tambe lo por participa, e ta haya importante pa mas departamento cu tin rol pa traha mas di cerca hunto y pa e motibo ey nan a traha un planning pa for di awor te cu fin di aña lo percura pa intensiva tur e patruyanan pa loke ta e vigilancia di frontera, tambe lo traha un planning pa percura cu e radarkamer constantemente tin personal den dje y no personal di un departamento so sino cu pa via di colaboracion tambe por tin personal como Warda Nos Costa, Inmigracion, Kurstwatch, KPA y Aduana pa traha mas di cerca pa asina ey eleva siguridad.

Ademas, Tjon a trece dilanti cu helicopter ta operacional y den cuadro di palabracionnan cu Hulanda tin full un plan cu a wordo traha pa siguridad di frontera e cual a wordo entrega dia 1 di november y na e momentonan aki nan ta den conversacion pa e parti di inversion den departamentonan y tecnologia. Pa tur pais di mundo e parti di siguridad di fronteranan ta un reto grandi” Tjon a afirma, tin personanan indocumenta cu ta keda drenta y pa nan ta importante pa sigui inverti den esaki, procesonan cu no ta costa placa nan tin cu percura pa nan por ta bon delinea.

Radar ta keda un punto pa nan, na unda cu Tjon a bisa cu nan mester keda monitoria pa percura cu constantemente tin e fondonan aloca pa por inverti den e parti tecnologico tambe.

Di loke ta trata Warda Nos Costa, tin personanan deteni na e momentonan aki cu ta na espera di vuelo humanitario cu ainda no tin confirmacion riba ki dia e lo bolbe tuma luga manera Tjon a comenta, “e ta un proceso cu a wordo encamina si” pero semper tin keho pa loke ta trata derechonan humano di parti di e personanan deteni y cu nan ta percura pa brinda e condicionnan ta segun normanan responsabel.

Pa e motibo ey instalacion di Warda Nos Costa a haya bishita di dos hues comisario pa asina por haci inspeccion necesario y wak si tur cos ta na su luga, “tin hopi destruccion den e luga cu ta costa hopi placa pa pais Aruba”, a unda cu cada persona cu ta den luga aki tambe tin un responsabilidad propio pa si e kier cu e condicionnan ta bon, nan mes tin cu tene na reglanan y no destrui e facilidadnan.

Curso pa Personal di JZP y demas profesional Tjon a informa cu el a reuni cu ekipo cu ta encarga pa percura cu Family Justice Center lo bira un realidad pa Aruba, esaki ta un centro caminda experticio ta bin hunto pa asina por atende cu casonan di entre otro, abuso sexual.

Segun Tjon henter Gabinete Wever-Croes ta para tras di e proyecto aki y ta p’esey cu nan ta boga tambe pa e forma parti di e presupuesto di aña 2022 unda a wordo comunica tambe na ekipo, riba esey ya caba dia 8, 9 y 10 di december lo tin e prome curso unda cu un compania di Hulanda ta bin brinda e curso aki cu ta Kinterview y nan lo percura pa tur recherche cu ta traha na Jeugd en Zeden Politie (JZP)participa asina como tambe incorpora psicologonan, ademas fiscalnan di Ministerio Publico tambe lo participa den e curso aki segun Tjon a manifesta.