A3 25mei dowers fondo pa husticia (NP).jpeg

E siman aki un grupo di sindicato a publica un lista di preocupacion pa loke ta e situacion cu criminalidad na Aruba. A puntra minister encarga cu husticia si el a tuma nota di e preocupacionnan aki. El a bisa cu el a mira e articulo cu a sali den corant di preocupacionnan. Tambe e ta splica poco di e retonan di e fondo di husticia.

 

“Nos a yega di combersa den dialogo social cu hopi sindicato, unda cu nan a trece nan punto di bista. Mi ta kere cu tur hende den comunidad tin un punto di bista riba con lo combati criminalidad. Tradicionalmente nos ta hiba discusion cu comunidad tambe pasobra nos ta kere cu tur hende por duna un contribucion y mester duna contribucion na loke ta trata haci pais mas sigur. Sinembargo, mi no a studia e puntonan den detaye.” 

 

Puntonan

Segun Sr. Dowers algun di e puntonan di bista ta cosnan cu e tambe ta comparti, algun cu ta puntonan cu ta haciendo caba y otronan cu mester analisa mas profundo. Tambe tabatin algun punto di kitamento di derecho di hende cual sigur lo trece hopi discusion den comunidad, el a bisa. “Si mi tuma un ehempel chikito, mi a mira cu nan ta bisa cu mester cobra tur hende cu ta bay den carnaval. Nos a yega di bisa cu hendenan cu ta organisa fiestanan y actividad nan ta gana hopi placa cu esaki, anto esun cu tin cu saca placa for di su saco pa percura pa tur e cosnan aki bay bon ta husticia. P’esey ta kere cu mester bin contribucion di e organisadonan aki. Pasobra ora tin un concierto, husticia mester saca placa di presupuesto pa overtime, pa percura cu e concierto bay bon, pa regula trafico, ordo publico etc. Pues ta husto pa paga un parti di e gastonan aki.” E mandatario a expresa cu ta atendiendo cu e punto aki y ta ocupa pa wak ki cambionan di ley mester bin.

 

Pa loke ta otro puntonan a treci como preocupacion, e aspecto di ilegalidad tambe ta puntonan cu ta atendiendo cun’e caba.  Si mira e cantidad di placa y medionan cu ta pone disponibel pa hende no drenta nos frontera ilegal, e ta hopi compleho pa mantene esaki riba un temporada hopi largo. Sinembargo, mayoria hende cu ta ilegal na e pais aki, y mayoria hende cu gara den crimen e ultimo añanan ta esunnan cu a drenta via di aeropuerto (manera menciona den articulo edicion anterior). E ora ta realisa cu e instrumento di controla frontera so no ta e solucion, pues mester haci mas cu esey  cual ta unda ta bin e castigonan pa persona nan cu ta facilita estadia di e hendenan. 

 

Fondo criminalidad

Pa loke ta fondonan di criminalidad a puntra Sr. Dowers con esaki ta hinca den otro cu e fondo extra cu ta ricibi di e fundacion di turismo. El a splica cu locual ta trata e fondo di turismo cu ta bay pa criminalidad tin palabracionnan pa hopi aña cu ta ricibi un suma di placa di nan, Aruba Hospitality & Security Foundation. Nan ta pone e placa disponibel pa polis, y practicamente tur e placa ta wordo uza pa e areanan cu ta mas frecuenta pa bishitante di e pais. E placa ta hopi tiki cen, pasobra si mira e cantidad di placa cu ta wordo uza na hopi otro cos of compara cu presupuesto di husticia, e placa no ta nada, Sr. Dowers a bisa. Pero door cu nos a pone for di nos presupuesto un gran cantidad di personal disponibel cu ta mucho mas cu e placa aki, ta kere cu e ta husto pa ricibi e placa aki. E placa ta yuda y ta algo palabra y ta contento cu nan ta cumpli cu e palabracionnan aki. E suma cu ta ricibi ta rond di 700 mil florin. “Ta asina cu nos mes ta buscando aumento aworaki den nos mesun presupuesto pasobra mester mas placa, husticia no ta polis so, sino hopi mas departamento, manera brandweer y prizon cu mester hopi inversion tambe pa pone cos cana. 

 

“Pa economia draai, un di e condicionnan mas importante ta brandweer. Si no tin brandweer optimal ta funciona na aeropuerto, bo aeropuerto no por funciona optimal y no por trece cantidad di turista cu ta trece. Pues ta importante pa ora papia di fondonan cu ta bin di diferente sector. ta hibando discusion den conseho di minister cu coleganan y a pidi aumento di presupuesto e aña cu ta bin pasobra e ta necesario pa garantisa e continuidad di economia di pais Aruba. Husticia mester por funciona optimal, esey ta un condicion cu si no cumpli cun’e nos tur ta sinti e consecuencia,” el a termina bisando.